Tórinen qonaq úzilmeıtin úlken úı

Jalpy, «Álemniń logıstıkalyq kartasy» degen uǵymnyń qoldanysqa engenine kóp ýaqyt bola qoıǵan joq. Bul qazirgi ýaqyttyń strategııalyq qujaty sanatyndaǵy baǵdar. О́ıtkeni, ekonomıkalyq ıntegrasııa dáýirinde el men el, qurlyq pen qurlyq arasyndaǵy taýar almasý men saýda-sattyq baılanystarynyń mańyzy artyp otyr. Qulaqqa sińisti bolǵan jahandaný uǵymyn bylaı qoıǵanda, memleketter arasyndaǵy iskerlik, óndiristik baılanystarsyz qazirgi álemdi elestetý qıyn. Al osy logıstıkalyq kartanyń mańyzdylyǵy nede? Máselen, ǵalamshardyń eki bóligine ornalasqan damyǵan memleketter arasyndaǵy qandaı da bir tıimdi kelisimderdiń tolyqqandy júzege asýy úshin olarǵa úshinshi memlekettiń kómegine júginýge týra keletindigi anyq. Bul jaǵdaıda úshinshi el úshin múmkindik kózi ashylmaq. Aýmaqtyq erekshelikterge saı ishki qyzmet kórsetý tetikterin iske qosýdyń tıimdi joldaryn tańdaǵan elder úshin bul ekonomıkalyq tabysqa jetýdiń de joly bolmaq. Hosh delik...   Dúnıejúzinde «Kólik logıstıkasy», «Kólik haby» degen termınderdiń keń taralǵanyn jáne oǵan erekshe mańyz berilip otyrǵandyǵyn aıttyq. Al logıstıkanyń túpki negizi «Barlyǵy adamdar úshin, adamdardyń laıyqty ómiri úshin...» qaǵıdasynan bastaý alatynyn eskersek, memleketter jalpy adamzat balasynyń ıgiligi úshin qoldan kelgenniń barlyǵyn jasaýy tıis. Dál osy qaǵıdattyń kórinisin jáne eń ozyq úlgisin elordamyz Astanadan anyq  baıqaımyz. Sonyń jarqyn mysaly áýejaıdan bastalady. «Qurmetti jolaýshylar! Biz mingen ushaq Astana qalasyndaǵy Nursultan Nazarbaev halyqaralyq áýejaıyna kelip qondy. Qosh keldińizder...» Endigi jerde Astananyń áýe keńistigine engen barlyq baǵyttaǵy ushaq bortyndaǵy alǵashqy habarlama joldary osylaısha aıtylatyn bolady. О́ıtkeni, el Úkimetiniń 2017 jylǵy 20 maýsymdaǵy № 381  qaýlysyna sáıkes Astana halyqaralyq áýejaıyna Elbasy, Qazaqstan Respýblıkasynyń  Prezıdenti Nursultan Nazarbaevtyń esimi berildi... Osylaısha álemniń áýe keńistigi arqyly jolaýshylar men júk tasymaldaý qyzmetindegi habarlamalarda ózgeris oryn alyp, dúnıejúziniń barlyq tilinde «Nursultan Nazarbaev halyqaralyq áýejaıy» ataýy aıtylatyn boldy. Iá, biz qatelesip otyrǵan joqpyz, álemniń adam men adam uǵysa alatyn jáne jazbasha tilderinde Elbasy atyndaǵy Astana áýejaıynyń ataýy júredi. Qarańyz, Nursultan Nazarbaev halyqaralyq áýejaıynan TMD elderiniń Máskeý, Tashkent, Omby, Sankt-Peterbýrg, Krasnoıarsk, Kıev, Mınsk, Ekaterınbýrg, Baký, Novosibir qalalaryna turaqty reıster ushady. Munyń syrtynda Frankfýrt, Vena, Ábý-Dabı, Ystanbul, Beıjiń, Antalııa, Úrimshi, Shardja, London, Bangkok qalalaryna tikeleı reıster taǵy bar. Áýejaı «Eır Astana», «SKAT», «Jetisý», «Bek Eır», «Transaero», «Lıýftganza», «Etıhad Eırýeıs», «Avstrııa avıajelileri», «Týrkısh Eırlaınz», «Aerosvıt», «Ýzbekıston Havo Iýlları», «Belavıa», «Ýkraına halyqaralyq avıajelileri», «Chaına Saýzen Eırlaınz», «Eır Arabııa», «Reseı Aeroflot» jelisi sııaqty kóptegen otandyq jáne shet memleketterdiń áýekompanııalarymen tyǵyz yntymaqtastyq ornatqan. Aıtpaqshy, Astana qalasynyń áýe­jaıy 1931 jyly salynyp bitip, ashyl­ǵa­nyn bilesiz be? Sol kóne áýejaı Eý­razııa keńistigindegi zamanaýı áýe­jaı­lardyń birine aınaldy. Qazir áýe ta­symaly qyzmetinde kirpik qaqpaı qyz­met etýge tolyqtaı kóshken áýejaı byl­tyrǵy jyly 3 mıllıon 419 myń 484 jolaýshyny kútip alyp, shyǵaryp sal­sa, 49 365 ret úzdiksiz ushaq reısin  qabyldaǵan. Osyndaı derekterdiń arasynan elordaǵa ushaqpen ushyp kelýshilerdiń qatary jaz aıynda eselep artady degen aıǵaq kezdestirip qaldyq. Astana turǵyndary biledi: elordanyń ásem bezendirilgen kósheleri men mádenı-demalys oryndaryndaǵy adamdardyń qarasy maýsym, shilde, tamyz aılarynda tolastaǵan emes. Demek, Astana qalasy – jerlesterimiz ben sheteldik qonaqtar úshin tórinen qonaq úzilmeıtin úlken úı, berekeli bosaǵa bolyp asqaqtaı beredi...