Qazaq elinde tuńǵysh uıymdastyrylǵan «Altyn jebe» týrnıri úsh kezeńnen: shapshań atý, qalqan atý jáne jamby atýdan turady. Aıta keter jaıt, jamby atý qazaq halqynda keń taraǵan mergendik synnyń bir túri. Atpen shaýyp kele jatyp jigitter ekpinin báseńdetpesten qurýly baqan ústindegi nysanany atyp qulatýǵa tıis. Ereje boıynsha sportshylar sórede óz sáıgúlikteriniń janynda bolady. Tóreshi belgi berisimen olar attaryn tez erttep, shaba jónelip, jolyndaǵy nysanalardy atyp qulatýlary kerek. Jarysqa 10-nan astam elden kelgen surmergender qatysýda. Bizdiń elden «Altyn jebede» bes sportshy baq synady.
Atap aıtqanda, «Altyn jebe» týrnıriniń júlde qory da óte qomaqty boldy. Bes orynǵa deıin báıge tigildi.
Belgili bolǵadaı, 1 oryndy Rýmynııadan kelgen Mıhaı Kýzmı alyp, 2 mln teńgeni qanjyǵasyna baılady. 2 oryn men 1 mln teńge qazaqstandyq sportshy Sarybaı Aıtbektiń enshisinde. 3 oryn jáne 700 myń teńgeni Aıkóz Eralǵan ıelendi. Tórtinshi oryn men 400 myń teńge Majarstannan kelgen Nemotı Krıstof Arpadqa buıyrdy. Bestikti Malaızııa sportshysy Muhamed Akmal bın Mohamed Dakalan túıindedi. Oǵan 200 myń teńge buıyrdy.
Budan buryn habarlanǵandaı, Memleket basshysy Nursultan Nazarbaev halyqaralyq «EKSPO-2017» mamandandyrylǵan kórmesiniń mádenı-dýmandy jáne sporttyq is-sharalarynyń keshendi baǵdarlamasy aıasynda ıppodromda ótip jatqan jamby atýdan «Altyn jebe» halyqaralyq týrnırin tamashalady.
Sonymen qatar, Qazaqstan Prezıdenti ıppodrom aýmaǵynda ornalasqan «Etnoaýyl» ulttyq-mádenı keshenin aralap kórdi.