Dalalyq, áýe jáne teńiz mashyǵy boıynsha saıys qorytyndysy nátıjesinde Reseı Federasııasynyń komandasy birinshi oryndy, Qytaı Halyq Respýblıkasynyń qurama komandasy ekinshi oryndy ıelendi.
Qazaqstandyq armııanyń abyroıy men bedeli úshin halyqaralyq arenada 350-den asa áskerı qyzmetshi baq synasty. Qazaqstannyń komandasy uıymdastyrýshylardyń baǵasy boıynsha kórnekilerdiń biri bolyp tanyldy. Oıyn tóreshileri alqasynyń músheleri Qazaqstan Qarýly Kúshteri áskerı qyzmetshileriniń joǵary daıyndyq deńgeılerin, kásipqoılyqtary men jaýyngerlik daǵdylaryn atap ótti. Quramamyzdyń qorjynynda 3 altyn, 7 kúmis jáne 5 qola medal bar.
Oıyndardyń saltanatty jabylý rásimine Qazaqstannyń Qorǵanys mınıstri general-polkovnık Sáken Jasuzaqov qatysty. Áskerı vedomstvo basshysy búgingi tańdaǵy halyqaralyq oıyndar dostyqtyń, halyqaralyq yntymaqtastyqtyń, beıbitshilik pen nıettestiktiń jańa nyshanyna aınalyp, aıryqsha mazmuny jáne ǵalamat aýqymymen erekshelendi dep atap ótti.
ArHO-2017 saıysynda qazaqstandyq quramanyń óner kórsetýiniń sharyqtaý shegi «Tank bıatlony» baıqaýy boldy. Onda tankishilerimiz 1 saǵat 45 mınýt 41 sekýnd nátıjesimen T-72 tankisiniń bazalyq modelinde joǵary kásibılik pen basqarý sheberligin pash etip, ekinshi oryndy ıelendi. «Dostastyq jaýyngeri» baıqaýynyń bas atalymnyń eki dúrkin chempıony atanǵan 97616 áskerı bóliminiń batareıa serjanty aǵa serjant Orynbek Sándibekovtiń jeńisin aıryqsha atap ótken jón.
Qazirgi ýaqytta Armııa halyqaralyq oıyndary halyqaralyq áskerı qoǵamdastyqta joǵary mártebege ıe bolyp otyr. 2017 jyly oıyn baǵdarlamasyna «UUA saıysy», «Dostastyq jaýyngeri», «Jol patrýli», «Kúzet saqshysy» jáne «Áskerı rallı» atty bes jańa baıqaý engizildi. Jyl saıyn elder arasyndaǵy dostastyq ózara qarym-qatynasty nyǵaıtý men damytýdyń mańyzdy faktory bola otyryp, saıystardyń pishimi jetildirilip, qatysýshylardyń aýqymy keńeıe túsýde.
«Egemen-aqparat»