Fýtbol «Astana» fýtbol klýby 17 tamyzǵa qaraǵan túni Astana ýaqytymen saǵat 00:45-te Chempıondar lıgasynyń pleı-off kezeńinde Glazgoda Shotlandııanyń 48 dúrkin chempıony «Seltıkke» qarsy oınaıdy. «Astana» komandasynyń basshylyǵy, «Astana» Prezıdenttik klýby jáne Astana qalasynyń ákimdigi «Qazmedıa» ortalyǵymen birlesken kelisimge kelip, atalǵan matchty «Qazmedıanyń» «Nurjol» býlvary jaǵyndaǵy úlken ekrannan tikeleı efırde kórsetpek.
Dzıýdo Chılıdiń Santıago qalasynda dzıýdodan kadetter arasynda álem chempıonaty aıaqtaldy. Qazaqstandyq balǵyn balýandar bul birinshilikte bir kúmis jáne bir qola medal ıelendi. Álem chempıonatyna 64 elden 428 jas sportshy qatysqan bolatyn. 60 kıloda beldesken balýanymyz Nurzat Sálimbaev jarystyń ekinshi kúninde el qorjynyna alǵashqy júldeni saldy. Ol fınaldyq básekede reseılik Kazbek Nagýshevke ese jiberip, kúmis medalǵa ıe boldy. Al 81 kıloda tatamıge shyqqan qazaqstandyq dzıýdoshy Serikbolsyn Shyntas qola medal ıegeri atandy. Úshinshi oryn úshin ótken beldesýde otandasymyz tájikstandyq balýan, kadetter arasynda Azııa chempıony Madjıdov Djohongırdi taza jeńdi.
Tennıs Tennısten Qazaqstannyń birinshi nómirli, álemniń 52-shi raketkasy Iýlııa Pýtınseva álemniń myqty tennısshileri bas qosqan Sınsınnatı (AQSh) týrnırin jeńispen bastady. Otandasymyz alǵashqy kezdesýinde dúnıejúzilik reıtıngte 75-orynda turǵan paragvaılyq Veronıka Sepede-Roıgty 6:4, 3:6, 6:3 esebimen utty. Endi Iý.Pýtınseva týrnırdiń ekinshi kezeńinde álemniń 8-raketkasy reseılik Svetlana Kýznesovamen kortqa shyǵady. Aıta keteıik, týrnırdiń júlde qory 2,5 mln AQSh dollarynan asady.
Ázirlegen Álı BITО́RE, «Egemen Qazaqstan»