Ár áńgimesiniń alǵashqy sóılemin oqyǵannan-aq murnyńa burqyrap jýsannyń ıisi keletin, qysqa áńgimelerimen-aq qazaq ádebıetiniń iri ókiline aınalǵan belgili jazýshy, Qazaqstan Respýblıkasy Memlekettik syılyqtyń laýreaty Saıyn Muratbekov turǵan úıge eskertkish-taqta ornatyldy.
Qazaq ádebıetiniń kórnekti ókili, kórkemsóz óneriniń úlken sheberi Saıyn Muratbekovtiń qaı shyǵarmasynyń da deńgeıiniń tómeni joq. 1950-jyldardyń basynda alǵashqy shyǵarmalary jarııalana bastaǵan kezden beri oqyrman qaýym onyń «Meniń qaryndasym», «Aýyl oty», «Kókoraı», «Otaý úı», «Dos izdep júrmin», «Jabaıy alma», «Eskek jel» sekildi jınaqtaryn qumarta oqýmen keledi. Onyń shyǵarmalary oqıǵa jelisiniń shynaıylyǵymen, kesteli tilimen, keıipkerleriniń bıik adamgershilik qasıetti joǵary qoıatyndyǵymen erekshelenip turady.
Kózi tirisinde bergen suhbattary men estelik jazbalarynda Saıyn aǵamyz kúz mezgilin erekshe jaqsy kóretinin kóp aıtatyn edi. О́zi de kúz mezgilinde dúnıege kelgen-di. Kúz kelgeli kelbetin ózgertip, san túrli boıaýlarǵa malynyp turǵan Almatynyń tamyljyǵan kúninde qalamgerge arnalǵan taqtanyń ornatylýy qazaq ádebıetine jasalǵan tartý sııaqty qabyldandy. Sebebi tórt qabatty eńseli úıdiń qabyrǵasy bul eskertkish-taqtany on jyl boıy kútti. Talantty jazýshynyń keıingi ómirine baılanysty atqarylar kóp sharýanyń biri osy bolatyn, ol da oryndaýyn tapqanda qýanbaǵan adam kemde-kem edi.
Zenkov pen Shevchenko kósheleriniń qıylysyndaǵy úıdiń qabyrǵasyna ornatylǵan taqtanyń shymyldyǵyn aqyn, belgili qoǵam qaıratkeri Oljas Súleımenov, Qazaqstan Jazýshylar odaǵynyń tóraǵasy Nurlan Orazalın jáne jazýshynyń týǵan baýyry Ábilákim Áýbákirov túsirdi. Taqta aldynda ádebıettegi qatarlastary men jasy kishi inileri Saıyn Muratbekovtiń adamı kelbeti men ádebı qarymyn teń sóz etti. О́z kezeńinde Qazaqstan Jazýshylar odaǵyn birge basqarǵan, qanattas, qalamdas qurdasy Oljas Súleımenov bir sát ótkendi eske alyp, dosynyń aty tarıhta qalatynyna senim bildirdi.
Qazaqstan Jazýshylar odaǵynyń tóraǵasy Nurlan Orazalın, aqyn Marfýǵa Aıtqojına, baýyry men balalary qarymy bólek qalamgerdiń erekshe jaralǵan adamı bolmys-bitimin tebirene turyp eske aldy. Bári de qalamgerge kórsetken qurmeti úshin qala ákimdigine alǵysyn bildirdi.
Aıgúl AHANBAIQYZY, «Egemen Qazaqstan»
ALMATY