Senat Tóraǵasynyń orynbasary Sergeı Gromov Qazaqstan Parlamentiniń delegasııasynyń quramynda TMD jáne UQShU-nyń parlamentaralyq qurylymdarynyń jumysyna, sondaı-aq Sankt-Peterbýrgte ótken Parlamentaralyq odaqtyń 137-shi Assambleıasyna qatysty, dep habarlady Senattyń baspasóz qyzmeti.
TMD-ǵa qatysýshy memleketterdiń Parlamentaralyq Assambleıasy Keńesiniń otyrysynda Dostastyq memleketterindegi bıylǵy saılaýlardy, onyń ishinde Qazaqstan Respýblıkasy Parlamentiniń Senaty saılaýyn baıqaýdy uıymdastyrýǵa baılanysty baıandamalar tyńdaldy. Sonymen qatar, jıynǵa qatysýshylar Ekonomıka jónindegi Sarapshylar keńesin qurý máselesin qarap, Reseı Federasııasynyń TMD-ǵa tóraǵalyq etý barysy týraly aqparatty tyńdady jáne TMD PAA jumysynyń 2018 jylǵa arnalǵan josparyn talqylady.
UQShU Parlamenttik Assambleıasynyń onynshy otyrysy barysynda terrorızmge jáne transshekaralyq qylmysqa qarsy is-qımyl salasyndaǵy ulttyq zańnamany jaqyndastyrý, qylmystyq ister boıynsha halyqaralyq quqyqtyq kómek kórsetý, aqparat salasyndaǵy quqyq buzýshylyqpen kúres máseleleri talqylandy. UQShU PA 13 úlgi zańdy qarady.
Qazaqstan Senatynyń ókilderi «Dinaralyq jáne ultaralyq únqatysý arqyly mádenı alýandyq pen beıbitshilikti ilgeriletý» taqyrybymen ótken Parlamentaralyq odaqtyń 137-shi Assambleıasyna (PAO) qatysty. 150 eldiń delegasııasyn qabyldaǵan PAO –173 memlekettiń zań shyǵarý organy men 11 uıymyn biriktiretin tarıhy baı halyqaralyq uıym.
PAO Assambleıasynyń qorytyndy otyrysynda «Demokratııa: bizdiń ár alýandyǵymyzdyń ortaqtyǵy týraly jalpyǵa birdeı deklarasııasynyń qabyldanýynyń 20 jyldyǵyna» qarary qabyldandy.
Aıta keteıik, Qazaqstan delegasııasynyń quramynda senator Sergeı Ershov pen Erik Sultanov ta boldy.