Biz buǵan deıin qysqy jylytý maýsymyna tastúıin daıyndyq jasaýdyń ornyna óz mindetterine salǵyrt qaraǵan basshylardyń jaýapkershilikke tartylǵany týraly jazǵan edik («Jalǵan aqpar jarǵa jyqty», EQ, №197. 13 qazan). Endi onyń «jyryna» qatty otyn tapshylyǵy qosylyp, Soltústik Qazaqstan oblysy Energetıka jáne turǵyn úı-kommýnaldyq sharýashylyǵy basqarmasy basshysynyń orynbasary Aıdarhan Mýsınniń turǵyndar aldynda esep berýine týra keldi.
Onyń aıtýynsha, Petropavl № 2 jylý-elektr ortalyǵynda eki júz myń tonnaǵa jýyq kómir qory jınaqtalǵan. Áleýmettik jáne bıýdjettik mekemeler jetkilikti túrde qamtamasyz etilgen. «Qazaqstan temir joly» UK» AQ pen «Shubarkól kómir» AQ arasyndaǵy kelisimshart aıasynda táýligine 700 tonna kómir jetkizý belgilengen. Tasymalmen «Otyn LTD» JShS, «Týrdyogly» jeke kásipkerligi de aınalysady.
Alaıda A.Mýsın jaǵdaı qalypty, kómir tapshylyǵy bolmaıdy dep qansha sendirýge tyrysqanymen, jurtshylyq kóńili áli de alań. Satylymǵa shyǵarylǵan 27 myń tonna qatty otynnyń sapasy syn kótermeıdi. Ásirese Qarajyra keninen ákelingen kómirge shaǵym aıtýshylar kóp. Qystan qysylmaı shyǵý úshin 400 myń tonnadan astam kómir qajet bolsa, jospar 65 paıyzǵa ǵana oryndalǵan. Vagondar jetispeýshiligi de anyq baıqalady.
Qazir sapasyna qaraı kómir baǵasy 7000-16000 teńge aralyǵynda qubylyp tur. Qaltasy kótere bermeıtinder amalsyz qolǵa tıgenine rıza.
О́mir ESQALI, «Egemen Qazaqstan»
Soltústik Qazaqstan oblysy