Qyrǵyz saıasatkeri Adahan Madýmarov Qazaqstan Respýblıkasynyń Prezıdenti Nursultan Nazarbaevqa «Youtube.com» vıdeo-portaly arqyly ótinish bildirdi.
Onda bylaı delingen :
«Men múmkindikti paıdalanyp, Qazaq eline, Elbasy, bútin túrik dúnıesiniń aqsaqaly atanǵan Nursultan Ábishulyna ótinish bildiremin.
Qurmetti, Nursultan Ábishuly!
Árdaıim qyrǵyz-qazaq mámilelerin asyldaı ardaqtap mápeli mámile jasap keldińiz. Sonyń bári bir kisiniń kesapatynan bútin jurtqa zııandy bolmasa eken degim keledi. Aıtqan kisiniń sózi men ózi kete bersinshi, biraq qalqaıǵan qalyń jurt bir zııan shekpese eken. Men keshe mynaý shekarada turǵan dıhandardy kórdim, júregi bar kisiniń kózinen jas shyqpaı qoımaıdy, qanshama kóp daqyl ekkender bar, nebir qıynshylyqpen solardy ósirdi, osy jaqqa shyǵyp tirlik qylsaq degen maqsatpen qanshama qıyndyqtardy kóre júrip, qolyndaǵyny balalarynyń aýzynan jyryp soǵan saldy. Qanshalaǵan júzim ekkender otyr, basqalar da otyr. Alty aı jazda jer tyrmalap tapqandarynan paıda kórer mezgilde onyń bárin tastandyǵa aınaldyrýǵa sol keraýyzdyq kesapat bolyp qaldy.
Bir aıtýmen toqtap qalmastan ekranǵa shyqqan saıyn qaıta-qaıta ústemeledi. Taǵy da stýdentterdi jınap alyp 86-ynshy jyldy eske salyp, basqalaryn eske salyp... Ol stýdentterge aıtatyn sóz emes. Ol oıynshyq emes. Bul óte aýyr másele. Iá, men tereń túsinem... Báribir Nursultan Ábishulynyń «Qyrǵyzǵa mendeı kúıingen azamat menen keıin kele me, kelmeı me, bilmeımin» degen sózi bar. Sondyqtan Siz ózińiz turǵanda qazir salqyn tartyp bara jatqan eki eldiń arasyndaǵy mámileni qaıta bir pysyqtap qoısańyz degim keledi. Júz myńdaǵan bizdiń dıhandardyń eńbegi tekke ketpese eken dep aıtqym keledi. Júz myńdaǵan jas, saryaýyz balapandar rızyqtarynan ajyramasa eken dep aıtqym keledi. Men resmı túrde osylaı qazaq bıligine ótinish bildiremin. Qudaı buıyrsa, bul kúnder ótedi.
Bizdiń aramyzdy eshkim ajyrata alǵan emes. Jaratqan Alla ǵana ajyratpasa qyrǵyz ben qazaqty eshkim ajyrata almaıdy. Ajyratamyz degenderdiń peıili tasqa urylsyn. Taǵy da biz «patsha bolýy úshin pildiń terisindeı teri kerek» dep Nursultan Ábishuly aıtqandaı basa aıtýymyz kerek. Ol kiside shyndyǵynda pildiń terisindeı teri bar eken. Sonshalyq sabyrlylyqpen mámile jasalyp jatqanyna men rızashylyǵymdy bildiremin. Áıtpese, Qudaı saqtasyn, jaman sózder óte kóp aıtyldy».