«Qazaq halqyna myń alǵys!». Osy sóz jazylǵan eskertkish Atyraý oblysy Mahambet aýdany Beıbarys aýylynda boı kóterdi. Bul – qıyn-qystaý kezeńde jatsynbaı, baýyryna basqan qazaq halqyna degen káristerdiń lebizi.
Seksen jyl buryn deportasııa kesirinen Qazaqstanǵa 96 myńnan astam káris halqy kúshtep kóshirilgen edi. Sonyń ishinde Atyraýmen taǵdyrlaryn tarıh toǵystyrǵandar da bar. Qazir óńirde úsh myńdaı káris ultynyń ókili turady. «Thonıl» atty etno-mádenı birlestik quryp, ulttyq salt-dástúrlerin umyt qaldyrmaı, aımaqtaǵy mádenı-kópshilik sharalarǵa belsendi qatysyp júr.
«Qıly zamandaǵy qasiretke 80 jyl tolǵanyn emes, káristerdiń qazaq jerinde osynsha ýaqyt baqytty, berekeli ómir súrip jatqanyn mereke retinde atap ótkimiz keldi,- deıdi belgili ǵalym Sergeı Ogaı. – Al eskertkish bizdiń qazaq halqyna degen sheksiz rızashylyǵymyzdyń belgisi».
Osy ataýly dataǵa oraı munaıly aımaqqa Ońtústik Koreıadan arnaıy delegasııa keldi. Oblys ákimi Nurlan Noǵaev Ońtústik Koreıa Respýblıkasynyń Qazaqstandaǵy elshisi Kım De-Sık pen konsýl Te Kıon Gondy, Qazaqstandaǵy kərister assosıasııasynyń prezıdenti Sergeı Ogaıdy qabyldap, Atyraý oblysy men Ońtústik Koreıa Respýblıkasy arasynda jaqsy qarym-qatynas qalyptasqanyn aıtty. О́tken jyly aradaǵy saýda aınalymy eki jarym esege ósip, bıylǵy segiz aıda 381 mln. AQSh dollarynan asqan. Qazir aımaqta Ońtústik Koreıa kapıtalynyń qatysýymen qurylǵan 4 birlesken kəsiporyn jumys isteıdi.
Baqytgúl BABASh,
«Egemen Qazaqstan».
ATYRAÝ.
Sýretti túsirgen Erlan ALTYBAEV