«Astana Opera» teatrynyń Kameralyq zalynda KSRO halyq ártisi, respýblıka Memlekettik syılyǵynyń laýreaty Ǵazıza Jubanovanyń 90 jyldyǵyna arnalǵan konsert ótti.
Kórnekti kompozıtor kózi tirisinde ulttyq mýzyka óneriniń damýyna ólsheýsiz úles qosty. Qazaqqa asa qadirli tekti áýlette dúnıege kelgen dúldúl ónerpaz artynda mol mádenı mura qaldyrdy. Ártúrli janrda ónimdi eńbek etip, halqynyń qurmetine bólenedi. Sondaı-aq Qurmanǵazy atyndaǵy konservatorııanyń rektory retinde talantty shákirtter tárbıelep, Qazaqstan Kompozıtorlar odaǵyn basqardy.
Kezinde Máskeýde Rodıon Shedrın, Andreı Eshpaı, Aleksandra Pahmýtova sekildi ataqty sazgerlermen birge oqyp, bite qaınasqan birtýar tulǵanyń shalqar shabytynan týǵan operalar, baletter, sımfonııalar, oratorııalar, romanstar, ánder talǵamy joǵary tyńdarmannyń kóńilinen oıyp oryn alǵany anyq.
Osy keshte onyń birqatar súbeli shyǵarmalary oryndalyp, kópshiliktiń qulaq quryshyn qandyrdy.
– Konserttik baǵdarlamaǵa, sondaı-aq álemdik klassıkanyń jaýharlary da engizildi. Bulardyń barlyǵy Ǵazıza Ahmetqyzy syndy aıaýly jannyń rýhyn asqaqtatýǵa ábden laıyq dúnıeler ekeni talassyz. Jastaıymyzdan jan-dúnıemizdi ásem áýenderimen terbegen uly mýzykanttyń qurmetine arnalǵan keremet keshte ishekti aspaptar kvartetine arnap jazǵan shyǵarmasyn erekshe qulshynyspen oryndap shyqtyq. Buǵan deıin birinshi jáne ekinshi skrıpkada oınasam, bul joly qolyma altti alýǵa týra keldi, –dedi Qazaqstannyń eńbek sińirgen qaıratkeri Baǵdat Ábilhanov.
Konsertke sonymen qatar halyqaralyq baıqaýlardyń laýreattary atanǵan skrıpkashylar Aısulý Baıkenova men Evgenııa Qurmanaeva jáne fortepıanoshy Anar Kamelınova qatysyp, sahna sánin keltirdi.
Talǵat SADYQULY