Mańǵystaý oblysy ákiminiń orynbasary Sh. Ilmuhanbetova «Biryńǵaı jınaqtaýshy zeınetaqy qory» AQ Basqarma tóraıymynyń orynbasary S. Egeýbaevamen kezdesti. Kezdesý barsynda eki jaqty memorandýmǵa qol qoıylyp, aldaǵy ýaqytta birlesip atqaratyn jobalardy talqylady.
Memorandýmnyń maqsaty - «Aqparatty Qazaqstan – 2020» memlekettik baǵdarlamasy sheńberinde taraptardyń arasynda seriktestik qatynas ornatý, uzaq merzimdi, tıimdi jáne ózara paıdaly yntymaqtastyqty damytý, sondaı-aq qoǵamnyń áleýmettik-ekonomıkalyq jáne mádenı damýy úshin aqparattyq orta qalyptastyrý.
Memorandým aıasynda halyqty jınaqtaýshy zeınetaqy júıesine tartý, mindetti zeınetaqy jarnalarynyń júıeli túrde túsýi men kólemin ulǵaıtý, zeınetaqy júıesin jańǵyrtý máseleleri, sondaı-aq Qor qyzmetin alýdyń balama múmkindikteri boıynsha aqparat berý maqsatynda qarjylyq saýattylyqty kóterý kózdelip otyr.
Sáýle Egeýbaevanyń dereginshe, búginde oblys halqynyń sany 655 myń adamdy qursa, olardyń ishinde 292 myńnan astamy ekonomıkalyq turǵydan belsendi. 2017 jylǵy 1 qazandaǵy jaǵdaı boıynsha oblysta mindetti zeınetaqy jarnalaryn esepke alý boıynsha 326,3 myń shot tirkelgen. Al olardaǵy zeınetaqy jınaqtarynyń kólemi 505,8 mlrd teńge. Bul Qazaqstan Respýblıkasy boıynsha mindetti zeınetaqy jarnalary esebinen qalyptasqan zeınetaqy jınaqtarynyń 6,8 paıyzyn quraıdy. Sondaı-aq 34,5 myń shot mindetti kásiptik zeınetaqy jarnalaryn (MKZJ) esepke alý boıynsha ashylǵan. Oblysta erikti zeınetaqy jarnalaryn esepke alý boıynsha shamamen 0,4 myń shot ashylǵan. Bul Qazaqstan Respýblıkasy boıynsha erikti zeınetaqy jarnalaryn esepke alý boıynsha ashylǵan shottardyń 1 paıyzyn quraıdy. Oblys turǵyndarynyń zeınetaqy jınaqtarynyń ortasha somasy 1 575 myń teńge, bul ortasha respýblıkalyq kórsetkishten 93 paıyzǵa joǵary.
Kezdesý barysynda Qazaqstan Respýblıkasynyń qoldanystaǵy zeınetaqymen qamsyzdandyrý modeli, jınaqtaýshy zeınetaqy júıesiniń jaı-kúıi, sondaı-aq turǵyndarǵa aqparat berý, olardy jınaqtaýshy zeınetaqy júıesine tartý jáne qarjylyq saýattylyǵyn arttyrý máseleleri de talqylandy.
Jıyn sońynda qol qoıylǵan memorandým aıasynda atalǵan máselelerdi sheshý boıynsha birlesken sharalar qarastyrylǵan. BJZQ osy Memorandýmǵa sáıkes oblys ákimdiginiń qoldaýymen jergilikti kásiporyndar men uıymdarda oblys turǵyndary arasynda aqparattyq-túsindirý jumystaryn júrgizip, jergilikti buqaralyq aqparat quraldarynda materıaldar jarııalaıtyn bolady.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy