Syrǵytpa jaýap, salǵyrt kózqaras

Biz, Parlament Májilisiniń bir top depýtattary 2017 jylǵy 6 qyrkúıekte bıyl mektep bitirgen túlek­terge joǵary oqý oryn­daryn­da bilim alý úshin bólin­gen mem­lekettik bilim berý granttaryn úılestirý isi qoǵamda narazy­lyq­tar týdyrǵany jóninde Premer-Mınıstrdiń orynbasary E.Dosaevtyń atyna depýtattyq saýal joldaǵan edik. Oǵan 2017 jyl­ǵy 6 qazanda № 20-34/2440 hat­pen «Altyn belgi» ıegerleriniń basym quqyǵynyń saqtalýy jáne laýazymdy qyzmetkerlerge qatys­ty jaýapkershilik sharalary joǵary oqý oryndaryna qabyl­daý boıynsha jyl saıynǵy monıtorıng sheńberinde aǵymdaǵy jylǵy qazanda qaralatyn bolady degen syrǵytpa jaýap berildi. Atal­ǵan máselelerge naqty jaýap bol­maǵan­dyqtan, biz tómendegi suraq­tary­myzdy Premer-Mınıstr Baqytjan Saǵyntaevtyń atyna joldadyq: 

1. Bilim jáne ǵylym mı­nıstr­li­giniń memlekettik bilim granttaryn taǵaıyndaý jónin­degi konkýrstyq komıs­sııasy qol­danystaǵy zańna­many basshy­lyqqa almaı, endi ǵana daıyndalyp, áli qabyldanbaǵan zań jobasyna silteme jasap, zań buzý­shylyqqa nege jol berdi?

2. 2017 jylǵy 26 shildedegi «Joǵary bilim alýǵa aqy tóleý úshin bilim berý grantyn berý» erejesine ózgertýler men tolyq­tyrýlar engizý týraly Qazaqstan Respýb­lıkasy Úkimetiniń №446 qaýlysy boıyn­sha grant bólýde «Altyn belgi» ıegerleriniń basymdyq quq­yǵy saqtalady delingen. Bilim jáne ǵylym mınıstr­liginiń osy qaýlynyń talabyn buzýyna qandaı negiz boldy? 

3. Birinshi tizimde grant taǵa­ıyn­dalyp, ekinshi tizimde grantqa ilinbegen talapkerlerdiń máse­lesi qalaı sheshildi? Elimizdiń bir joǵary oqý ornyna túsýshiler tizi­­mi­nen alynyp tastalyp, basqa óńir­lerdegi joǵary oqý oryndary­na jiberilgen talapkerlerdiń áleý­mettik jaǵdaılary eskerildi me?

4. Keıbir medısınalyq ma­man­­­dyqtar boıynsha bólingen mem­leket­tik tapsyrystyń medısı­na­lyq joǵary oqý oryndarynyń arasyndaǵy bólinisi qujattar tapsyrý aıaqtalýyna 1 kún qalǵanda jarııalaný sebebi nede? Buqaralyq aqparat quraldarynda taralǵan aqparatqa sáıkes medısına­lyq joǵary oqý ornyna túsýge «Altyn belgi» ıegerlerine berilgen 220 grantty Densaýlyq saqtaý mı­nıstrligi bir kúnde jaramsyz etip tastaǵanyn qalaı túsinýge bolady?

5. Grant bólý kezinde eki túrli buıryq shyǵaryp, qatelik jibergen Bilim jáne ǵylym, Densaýlyq saq­taý mınıstrlikteriniń jaýap­ty qyz­metkerleri qandaı jaýap­ker­shi­lik­ke tartyldy degen suraqtarǵa da naqty jaýap berilmeýiniń sebebi nede? 

Sonymen birge E.Dosaevtyń atynan kelgen resmı jaýapta qujat­ty daıyndaǵan oryndaý­shy­nyń aty-jóni men telefon nómiri kórsetilmegen. Munyń ózi Par­lament depýtattaryn syıla­maý­shylyq belgisi ǵana emes, Premer-Mınıstrdiń qaýlysy­men bekitilgen Keńsede is júr­gizý jónindegi nusqaýlyqtyń 44-tar­maǵyn buzý dep sanaımyz. Osy máselege de nazar aýdaryp, sharalar qoldanýyńyzdy suraımyz.

Ábdimanap BEKTURǴANOV,

Májilis depýtaty