Elbasynyń atyna «Káýsár-Bulaq» áleýmettik kómek kórsetý ortalyǵy» qoǵamdyq birlestiginen jáne elimizdiń birqatar óńiriniń turǵyndarynan hattar kelip tústi. Bul hattarda ıpotekalyq turǵyn úı qaryzdaryna oraı memlekettik qaıta qarjylandyrý baǵdarlamasy arqyly áleýmettik jaǵdaıy tómen otbasylarǵa kómek kórsetilgeni úshin Memleket basshysyna rızashylyq bildirilgen, dep habarlady Prezıdenttiń baspasóz qyzmeti.
Eske sala keteıik, 2015 jylǵy 11 aqpanda Nursultan Nazarbaev Úkimettiń keńeıtilgen otyrysynda azamattardyń ıpotekalyq qaryzdaryn qaıta retteý jóninde tapsyrma bergen bolatyn. Soǵan sáıkes, Úkimet pen Ulttyq bank tarapynan 130 mıllıard teńge bólinip, búginde 22 myńǵa jýyq azamat óz baspanalaryn saqtap qalýǵa múmkindik aldy. Osy máseleniń oń sheshimin taýyp, iske asýyna oraı elimizdiń birneshe óńirinen hat jazǵan azamattar Memleket basshysyna zor rızashylyqtaryn jetkizgen.
Atap aıtqanda, Almaty qalasynyń turǵyny Baqyt Ýaqasova Elbasyna memlekettik baǵdarlama aıasynda ıpotekalyq nesıe boıynsha belgilengen paıyzdy azaıtyp, áleýmettik jaǵdaıy tómen otbasylaryna kómek kórsetkeni úshin alǵys bildirgen. Al Shymkent qalasynan Álııa Qadyrqulova: «Siz ıpoteka arqyly satyp alynǵan jalǵyz baspanany tartyp almaý, nesıeni qaıta qarjylandyrý, múmkindigi shekteýli adamdarǵa jeńildikter jasaý týraly tapsyrma berip, qarapaıym halyqtyń rızashylyǵyna bólendińiz. Ári qaraı da halyqtyń áleýmettik jaǵdaıyn jaqsartyp, qamqor bolatynyńyzǵa senimdimin», dep jazǵan.
Almaty oblysynyń Qarasaı aýdanyndaǵy Irgeli aýylynyń turǵyny Márzııa Ospanova: «Ipoteka arqyly alǵan baspanamyzdy otbasymyzda saqtap qalýǵa múmkindik týǵyzǵanyńyz úshin rızashylyǵymyzdy jetkizgimiz keledi. Halqyńyzdyń jaǵdaıyn jasap, qıynshylyqta qolushyn bergenińiz úshin alǵysymyz sheksiz», degen ystyq yqylasyn joldaǵan.
Hat ıeleri Nursultan Nazarbaevqa zor densaýlyq pen uzaq ǵumyr, sondaı-aq elimizdiń ósip-órkendeýi jolyndaǵy eńbegine mol tabys tilegen. Memleket basshysy óz atyna kelip túsken hattarmen muqııat tanysyp, jyly lebizderin bildirgen azamattardyń barlyǵyna alǵys aıtty.