Astanada «EKSPO-2017 murasy» atty dóńgelek ústel ótti. Jıynǵa Syrtqy ister mınıstri Qaırat Ábdirahmanov, «Astana» halyqaralyq qarjy ortalyǵynyń basshysy Qaırat Kelimbetov, Energetıka mınıstri Qanat Bozymbaev, Aqparat jáne kommýnıkasııalar mınıstri Dáýren Abaev jáne BUU Damý baǵdarlamasy keńsesiniń ókilderi qatysty.
Birinshi kezekte baıandama jasaǵan Syrtqy ister mınıstri Q.Ábdirahmanov EKSPO-2017 halyqaralyq kórmesi aıaqtalǵannan keıin onyń ornyndaǵy ǵımarattardy tıimdi paıdalaný jumystary bastalyp ketkenin atap ótti.
«Elbasy Nursultan Nazarbaev EKSPO-2017 kórmesiniń jabylý saltanatynda «Astana» halyqaralyq qarjy ortalyǵy, halyqaralyq Astana haby, jasyl tehnologııa ortalyǵy, IT-startaptarǵa arnalǵan álemdik alań sheteldik áriptesterimizdiń nazaryna usynylatynyn málimdegen bolatyn. Qazirgi tańda Qazaqstandaǵy jaýapty mınıstrlikter men uıymdar EKSPO-2017 sharasynyń murasyn tıimdi júrgizý jumystaryna kirisip ketti», dedi Q.Ábdirahmanov.
«Astana» halyqaralyq qarjy ortalyǵynyń basshysy Q.Kelimbetov mekemeniń jumys barysyn túsindirip, aldaǵy josparlarymen bólisti. Onyń aıtýynsha, «Astana» HQO jumysyn úılestirý Memleket basshysy N.Nazarbaev anyqtap bergen «100 naqty qadam» Ult jospary aıasynda júzege asyrylyp jatyr. Ult josparynda aıtylǵan bes baǵyttyń úsheýiniń tikeleı «Astana» HQO jumysyna qatysy bar.
«Astanada qurylatyn qarjylyq ortalyq aǵylshyndardyń ortaq quqyqtyq zańynyń negizderi men erejelerine baǵynady. Bıylǵy naýryzda Konstıtýsııaǵa engizilgen ózgeristerge sáıkes, Astanada qarjy salasyna arnalǵan arnaıy alań qurylmaq. Osyǵan sáıkes, 2018 jylǵy 1 qańtardan bastap «Astana» qarjy ortalyǵynyń jumysyn bastap ketýge ázirmiz», dedi ortalyq basshysy.
Q.Kelimbetovtiń paıymdaýynsha, «Astana» HQO-nyń Nasdaq jáne Shanhaı bırjasymen birlese jumys isteýi ortalyqtyń aımaqtaǵy biregeı qarjy alańyna aınalýyna múmkindik beredi. Sondaı-aq Q.Kelimbetov ınvestısııalyq daýlardy sheshýge arnalǵan mekeme qurylatynyn málimdedi. О́z kezeginde, bul mekeme Qazaqstanǵa ınvestısııa salǵysy keletinder men olardyń quqyǵyn qorǵaý máselesi tolǵandyratyndar úshin paıdaly.
Sonymen qatar Q.Kelimbetov «Astana» halyqaralyq qarjy ortalyǵynyń jumys baǵdarymen bólisti. Birinshi, kapıtal naryǵyn damytý josparda bar. Buǵan qosa, elde jekeshelendirý jumystary odan ári jalǵasa beredi. Kelesi jyldan bastap «Samuryq-Qazyna» sekildi ulttyq kompanııalar jekeshelendirý baǵdarlamasyna kirisedi. Jospar boıynsha, bul sharalar keler jyldyń ekinshi jarty- jyldyǵynda «Astana» HQO aıasynda júzege asady. Sondaı-aq Q.Kelimbetov aktıvterdi basqarý, Islam banki júıesi, qarjylyq tehnologııalardy damytý josparǵa enetinin atap ótti.
Energetıka mınıstri Q.Bozymbaev EKSPO-2017 murasyn jasyl tehnologııaǵa aınaldyrý jóninde áńgimelep berdi. Onyń aıtýynsha, Eýropa qaıta qurý jáne damý banki (EQDB) men Energetıka mınıstrligi arasyndaǵy kelisimge saı Qazaqstanda birqatar mańyzdy jobalar júzege asty.
«EQDB taıaý jyldary Qazaqstanǵa 200 mıllıon eýro kóleminde ınvestısııa salýdy kózdep otyr. Jańǵyrmaly energııa kózderin damytý jóninde Energetıka mınıstrligi men Eni International jáne General Electric kompanııalary arasynda memorandýmǵa qol qoıyldy. Atalǵan qujatqa saı, elimizde ozyq tehnologııalardy paıdalana otyryp, qýaty 50 megavatt jel elektr stansasyn salýǵa múmkindik bar. EQDB tarapy men «Samuryk Kazyna-United Green» kompanııasy Qyzylorda oblysynda qýaty 50 megavatty kún elektr stansasyn salý jóninde ózara mandattyq hat almasty. Sondaı-aq qýaty 100 megavattyq «Astana Expo-2017» jel parkin salý týraly «Qazaqstan Damý banki», «SATEK Green Energy» jáne «BRK-Lızıng» kompanııalary arasynda qarjylandyrýǵa nıet bildirgen kelisim jasaldy», dedi Q.Bozymbaev.
Aqparat jáne kommýnıkasııalar mınıstri D.Abaev IT-startaptarǵa arnalǵan Astana Hub halyqaralyq tehnologııalyq park qurý jónindegi úkimet jumysyn tanystyrdy. Mınıstrdiń aıtýynsha, startaptyń ekojúıesin damytý jáne qurý jóninde, álemniń túkpir-túkpirindegi startapshylardy elimizge tartý maqsatynda qazaqstandyq jumys jospary ázirlendi.
«Tehnologııalyq park «Astana» halyqaralyq qarjy ortalyǵy aımaǵynda tirkelgendikten, korporatıvti tabys salyǵy men jeke tabys salyǵy boıynsha jeńildikterge ıe bolady. Tehnologııalyq parkke EKSPO-2017 aýmaǵynan 10 000 sharshy metr kólemindegi pavılon bólindi. Qazirgi tańda onda jóndeý jumystary júrgizilip jatyr», dedi D.Abaev.
Tehnologııalyq parkte jumys isteıtinderge birqatar jeńildikter qarastyrylǵan. Máselen, startap-toptarǵa EKSPO-2017 aýmaǵynan jaldamaly turǵyn úıler usynylady. Sheteldikterge arnalǵan vıza júıesin de jeńildetý josparlanyp otyr. Sonyń nátıjesinde, 46 eldiń ókilderi bir aı kóleminde erkin vızalyq júıeniń paıdasyn kóredi.
Dóńgelek ústel sońynda BUU Damý baǵdarlamasy keńsesiniń ókilderi men Qazaqstandaǵy shet memleketterdiń elshileri ózderin mazalap júrgen suraqtaryna laıyqty jaýaptar aldy.
Abaı ASANKELDIULY, «Egemen Qazaqstan»