Qazaq memlekettik qyzdar pedagogıkalyq ýnıversıtetiniń 2-kýrs stýdenti Marjan Jetpisbaeva «Qyz syny jáne Jigit sultany» qalalyq baıqaýynyń Gran-prı ıegeri atandy. Bul týraly oqý ornynyń medıa ortalyǵy habarlady.
Almaty qalasy jastar saıasaty jónindegi basqarmasynyń qoldaýymen «Q-Fest» jobasynyń aıasynda ótken saıys ońtústik astanalyq joǵary oqý oryndarynyń stýdentteri arasynda tuńǵysh ret uıymdastyrylyp otyr. Dodaǵa irikteý kezeńderinen top jaryp shyqqan 20 úmitker qatysyp, baqtary men baptaryn synady.
Joba uıymdastyrýshylary – ál-Farabı atyndaǵy QazUÝ-dyń «Keremet» jastar resýrstyq ortalyǵy» qoǵamdyq uıymy men ál-Farabı atyndaǵy QazUÝ-dyń Stýdentter senaty.
– Is-shara Memleket basshysynyń «Rýhanı jańǵyrý» baǵdarlamasyn jáne Almaty qalasynda «Jastar jyly» jobasyn júzege asyrý oraıynda iske asyrylyp otyr. Maqsat – jastar boıynda ulttyq tárbıe qundylyqtaryn damytý, memlekettik tildiń qoldanysyn keńeıtý, jastardyń jeke tulǵa retinde jarasymdy damýyna, búgingi qyzdar men jigitterdiń shyǵarmashylyq jáne joǵary zııatkerlik áleýetin arttyrý, tabıǵı sulýlyqty nasıhattaý. Baıqaý barysynda jastar boıyndaǵy ózderi úshin jańa jáne dástúrli emes múmkindikter men shyǵarmashylyq qabiletterin ashý maqsatynda túrli sheberlik synyptary men trenıngter ótkizildi. Ol óz kezeginde qatysýshylar arasynda qazaq halqynyń salt-dástúrin nasıhattaýǵa, ata-babalarymyzdyń tól mádenıeti jaıly bilimin keńeıtýge yqpal etedi. Osy taqylettes saıystar jastar arasynda salaýatty ómir salty ıdeologııasyn qalyptastyrýǵa sep bolmaq, – deıdi shara uıymdastyrýshylary.
Aqtyq márege qatysýshylardyń ıntellektýaldy óresi men óneri, bilimi saralandy. Arýlar óz qolymen daıyndaǵan ulttyq taǵam ázirleýdegi sheberligin, sultandar at ábzelderi men ulttyq dástúrlerge baılanysty suraqtarǵa jaýap berip alǵyrlyqtaryn da baıqatty.
Saıyskerler «Sálemdesý», «Suraq-jaýap», «О́ner» «Ulttyq naqyshtaǵy zamanaýı sán úlgilerin kórsetý» kezeńderi boıynsha baq synasty. Olarǵa óner adamdary men mádenıet qaıratkerlerinen quralǵan qazylar alqasy baǵa berdi.
Tartysty ótken jarys kórermenderge erekshe áser syılaǵany anyq. Qatysýshylardyń biri áserli ánderimen jurtshylyqty tánti etse, endi biri kórkem bıimen, sahnalyq kórinisterimen kópshiliktiń ystyq yqylasyna bólendi.
Ádilqazylar alqasynyń uıǵarymy boıynsha, Qazaq memlekettik qyzdar pedagogıkalyq ýnıversıtetiniń О́ner jáne mádenıet fakýltetiniń stýdenti Marjan Jetpisbaeva júzden – júırik, myńnan – tulpar shyǵyp, úzdik dep tanyldy. Al, qalǵan arýlar túrli atalymdar boıynsha marapattaldy.
– Búginde ulaǵat uıasy atanǵan Qyzdar ýnıversıtetiniń «Mádenı-tynyǵý jumysy» mamandyǵynyń 2-kýrsynda bilim alamyn. Buǵan deıin Almaty qalalyq «Kórkemsóz oqý sheberleriniń» konkýrsyna, «Ana tili arýy – 2017» baıqaýyna qatysyp, júldeli oryndarǵa ıe boldym. Al, bul saıys men úshin orny erekshe. Baıqaýda jeńimpaz atanýyma, ásirese ustazym Merýert Túsipbaeva kóp eńbek sińirdi. Jarys barysynda kórsetken qoldaýy úshin bilim men ǵylymnyń qarashańyraǵy atanǵan oqý ordasynyń oqytýshylary men stýdentterine de alǵys aıtqym keledi, – dep atap ótti M. Jetpisbaeva.
Arýlar saıysynan júldemen oralǵan boıjetkendi Qazaq memlekettik qyzdar pedagogıkalyq ýnıversıtetiniń rektory Gaýhar Aldambergenova qabyldap, jeńisimen quttyqtady. Oqý ornynyń basshysy óz sózinde damýdyń dańǵyl jolyna baǵyt alǵan bolashaǵy baıandy eldiń órisi qashanda bilikti de sanaly hám ónerli urpaǵymen keńeıetindigin aıtty.