Ortalyq saılaý komıssııasynda «Mektep prezıdentin saılaý» qanatqaqty jobasynyń qorytyndylaryna arnalǵan kezdesý ótti. Oǵan mektepterdiń saılanǵan prezıdentteri, mektep saılaý komıssııalarynyń tóraǵalary, birqatar mektepterdiń dırektorlary, Astana qalasy bilim berý basqarmasynyń jáne qalalyq saılaý komıssııasynyń, sondaı-aq jobany iske asyrýǵa qoldaý kórsetken aýdandyq ákimdikterdiń basshylyǵy qatysty.
«Mektep prezıdentin saılaý» jobasy bolashaq saılaýshylardyń quqyqtyq mádenıetin arttyrý maqsatynda oqýshylarǵa saılaý qyzmetiniń praktıkalyq baǵdarlanǵan bilimdi, mashyqtar men tájirıbeni berý úshin jaǵdaılar jasaýǵa baǵyttaldy. Mektep prezıdentteriniń saılaýaldy naýqany Astana qalasynda 20 qyrkúıekte bastalǵan. Biryńǵaı daýys berý kúni 22 qazanda jalpy bilim berý mektepteriniń – №37 orta mekteptiń, №6 mektep-gımnazııanyń jáne №76 mektep-lıseıdiń bazasynda, ıaǵnı elordanyń ár aýdanynyń bir-bir mektebinde ótti. Jobaǵa atalǵan mektepterdiń 2-11- synyp oqýshylary (barlyǵy 6 026 oqýshy) qatysty.
Úsh mektep prezıdentteriniń laýazymyna 22 kandıdat – 9-10-synyp oqýshylary úmitker boldy. №76 mektep-lıseıde jeńimpaz saılaýshylardyń 50%-nyń daýysyn jınap, birinshi kezeń nátıjeleri boıynsha anyqtalsa, №6 mektep-gımnazııa men №37 orta mektepte saılaýdyń ekinshi kezeńi uıymdastyryldy. Ekinshi kezeńde birinshi kezeńde eń kóp daýys jınaǵan eki kandıdattyń arasynan kóshbasshy tańdaldy. Al saılaý prosesterin mektep saılaý komıssııalary uıymdastyrdy.
Ortalyq saılaý komıssııasynyń hatshysy Sabıla Mustafına mektepterdiń saılanǵan prezıdentteri – №37 orta mektebiniń 9A-synyp oqýshysy Tomırıs Kúlmaevany, №6 mektep-gımnazııasynyń 10B-synyp oqýshysy Ivan Nechaevty, №76 mektep-lıseıdiń 10A-synyp oqýshysy Mıras Skendrd, sondaı-aq mektep saılaý komıssııalarynyń tóraǵalaryn quttyqtady. Is-sharaǵa qatysýshylardyń barlyǵy Ortsaılaýkom tóraǵasynyń atynan Alǵys hat jáne estelik syılyqtarmen marapattaldy.
Álısultan QULANBAI, «Egemen Qazaqstan»