Jaqynda Ońtústik Koreıa astanasy Seýl qalasynda gir sportynan álem chempıonaty bolyp ótti. Álemniń 34 elinen 500 sportshysy qatysqan jarysta Kókshetaý qalasynyń turǵyny Borıs Nuǵmanov absolıýttik chempıon atandy.
Jer sharynyń eń myqty gir kóterýshileri jınalǵan Seýldegi álemdik chempıonatta kókshetaýlyq aqsaqal 74 jastaǵy sportshy ardagerler arasynda top jardy. 70-74 jas aralyǵynda óner kórsetken Borıs aqsaqal boıynda rýh pen namystyń qyzýy bar ekenin bilektiń kúshimen dáleldedi. Ásirese girdi silke kóterýden álemdegi eń myqty sportshy ekenin kórsetti. Zildeı temirdi kóterýdiń qyr-syryn jaqsy meńgergen B.Nuǵmanov óz mashyǵynyń syrymen bylaısha bólisti: «Gir kóterýdiń bul túrinde aldymen ony kóterip keýdege tireımiz de, artynan joǵary sermeımiz, 1-2 sekýnd ustap turyp, qaıtadan keýdege ákelemiz de tómen syrǵytamyz. Osylaısha qaıtalaı beremiz».
Árıne aıtýǵa ońaı, al 500 sportshy qatysqan aıtýly dodada jeńip shyǵý ońaı bolmaǵany anyq. О́ıtkeni qyzý jarysta qos saıys boıynsha baq synasqan Borıs aqsaqal ekinshi oryndy qanaǵat tutypty. Bul rette atlet 2008 jyldan beri ardagerler saıysyna belsendi qatysyp keledi. Sóz reti kelgende aıta ketý kerek, ústimizdegi jyldyń qazanynda ótken Qazaqstannyń jatyp syǵymdaý chempıonatynda da jeńimpaz bolǵan edi. Mine, endi, álemdik dodada top jaryp otyr. Elge orala salysymen Borıs aqsaqal kelesi jyldyń mamyrynda Býdapesht qalasynda ótetin Eýropa chempıonatyna daıyndyqty bastap ta jiberdi.
Asqar TURAPBAIULY, «Egemen Qazaqstan»
Aqmola oblysy