...«Eshteńe etpeıdi, ol aqyn ǵoı». Osy tirkestegi «aqynnyń» ornyna «ınjener», «zootehnık», «pedagog», «fılosof» degen kásibı ataýlardy salyp oqyp kórińizshi, sizge qaıdam, menińshe jaraspaıtyn sekildi.
...Aqyndar jurttyń bári qatelespeýge kóshken kezeńderde qatelesip júretin halyq. Jurttyń bári jańylys baspaýǵa tyrysatyn mezgilderde ózi baryp otqa urynyp júretin el. Sondyqtan bolar, eskishe aıtsaq «Sharq jerııatynda» (Shyǵys poezııasynda) aqyndardyń bári – derlik ózderin jyndy kóbelek – párýanaǵa teńegen.
* * *
...Qaı kezde de poezııanyń basty mindetteriniń biri – qoǵamdyq oıdyń qozǵaýshy kúshi bolý. Sum úreı, sýyq qorqynysh adamdardy qatelespeýge úıretken zamandar bizdiń qoǵamda da boldy. Ol zamandar aqyndardy, aqyndar ol zamandardy túsine almady. «Poetov tırany – ne ponımaıýt, kogda ponımaıýt – togda ýbıvaıýt». Andreı Voznesenskııdiń osy óleńin oqyǵan saıyn, eń birinshi Shákárim, Maǵjan, Ǵumar, Ahmet t.b aqyndar oıǵa oralady... Osy atalǵan aqyndardyń «qatesi» sonda – olar halyqtyń júrek otyn óshirip almaý úshin kúresti. Al zaman úshin júrek oty bar adamdardan góri, aıtqanǵa kónip, aıdaýǵa júrip, «láppaı, taqsyrlap» turatyn «jany joq japharquldar» kerek edi. Olar úshin jurttyń qubyla qaıda, kúnshyǵys qaıda ekenin bilýi tıimsiz edi. Hal-qadir, shama-sharqynsha olar ózderine kerekti jurtty jasaı bildi. Sol jurt keshegi bozdaqtar ustalatyn tusta «aramyzdan adamdar alastatylsyn» dep keýde uryp shyqty, jınalystarda ashyla saırady, gazet-jýrnaldarǵa maqala, feletondar jarııalady. Janymen, júregimen súıgen óz eli, týǵan halqy kelip óz qulynyn tepkende aqyn turdy kózi jasaýrap. Ne deıdi ol? Kimge muńyn ótkizedi?
* * *
...Ár aqyn – ózinshe bir álem. Oǵan ózgelerdiń deńgeıin ólshem qylyp qaraýǵa bolmaıdy. S.Esenındi V.Maıakovskıı jazǵan saıası óleńderdi nege jazbadyń dep eshkim qaralaǵan joq. Sondaı-aq Amanhan Álimovten Jappar О́mirbekov poezııasyndaǵy saýat-bilikti, saıası pafosty talap etýge bolmaıdy...
Esenǵalı Raýshanov
«Aqynǵa kerek aqyl kóp...» maqalasynan
«О́rken» gazeti, 1990 jyl, 4 tamyz