Batyrlar men ǵashyqtardyń eli Aıagóz aýdanynda qasıetti juma kúni ǵıbraty mol ózgeshe toı ótti. О́zgesheligi sol, bul toı ádettegideı meıramhanada nemese dámhanada emes, aýdandyq áleýmettik kómek kórsetý ortalyǵynda ótip, qos múmkindigi shekteýli azamat Temirlan men Mádınanyń aq nekesi ózderin tárbıelegen, áli de qamqorlyq tanytyp kele jatqan shańyraqtyń tórinde qıyldy.
Aýdandyq jastar resýrstyq ortalyǵynyń dırektory Saıat Ibraev ómirdiń qıyndyǵyna qaıyspaǵan qaısar jandardyń bas biriktirip, jup jarastyrǵan qýanyshyna óńir jurtshylyǵy alǵash ret kýá bolyp otyrǵanyn aıtady. «Keıde on eki múshesi saý adamdar taǵdyrdyń bolmashy synaǵyna shydamaı bordaı úgilip, ómirden túńilip jatady. Kerisinshe, týabitti kemtar nemese taǵdyr taýqymetimen múgedek bolǵan jandar ómirge qushtar keledi. Jaratqan Iemiz bul jandardyń bir múshesin kem jaratyp, múmkindigin shektegenimen, muqalmas erik-jiger, qajymas kúsh berip, jan jarasyn jeńildetetindeı. Temirlan men Mádına bir-birin 10 jyldan beri jaqsy tanıdy eken. AHAJ qyzmetkerleri de, meshit ımamy da osynda kelip, olarǵa neke kýáligin tapsyrdy. Toıy da osy jerde ótti. Qýanyshqa aýdan ákiminiń orynbasary, meshittiń naıb-ımamy, máslıhat depýtattary, ishki saıasat bólimi, aýdandyq kómek kórsetý ortalyǵynyń qyzmetkerleri men tárbıelenýshileri, qarııalar, eki jaqtyń ata-anasy men týǵan-týystary da ortaqtasyp, izgi tilekterin bildirip, syı-sııapattaryn tabystady», - deıdi ol.
Al ómirdiń synaǵyna syr bermeı, jańa ómirge bet túzegen jandardyń nekesin qıǵan Aıagóz ortalyq meshitiniń naıb-ımamy Erjan qajy Tóleýbaev ta mundaı jáıtke óz tájirıbesinde alǵash ret kýá bolǵanyn, óziniń azdap tolqyǵanyn da jasyrmady. «Qobaljyǵanymyz ras. О́ıtkeni, qazir bizdiń qoǵamymyzda qol-aıaǵy balǵadaı, tepse, temir úzetin azamattarymyzdyń otbasyn qurmaı, salt attyly, sabaý qamshyly bolyp júrgeni az ba? Nemese búgin kóńil jarastyrǵan jastardyń jyl tolmaı, tipti bir-eki aı ótpeı ajyrasyp jatqandary oılandyra ma? Árıne, oılandyrady. Osy turǵydan kelgende Temirlan men Mádınanyń shańyraq kóterýin birinshiden, batyldyq, ekinshiden, kóptegen adamdarǵa úlgi-ónege dep esepteımin. Áleýmettik kómek kórsetý ortalyǵynyń qyzmetkerleri buryn tomaǵa-tuıyq júretin ekeýiniń sońǵy kezderi kóńil-kúılerinde oń ózgeris baıqalyp, ómirge degen qulshynystary arta túskenin bizge qýana jetkizdi. Sondyqtan osy ortalyq qyzmetkerleriniń eńbegin de esten shyǵarmaı, alǵys aıtýymyz kerek shyǵar», - deıdi ımam.
Azamat QASYM,
«Egemen Qazaqstan»
Shyǵys Qazaqstan oblysy,
Aıagóz aýdany