Búgin Premer-Mınıstr Baqytjan Saǵyntaevtyń tóraǵalyǵymen ótken QR Úkimeti otyrysy barysynda Qazaqstanda jekeshelendirýdi júrgizý barysy qaraldy. Ulttyq ekonomıka mınıstri Tımýr Súleımenov pen qarjy mınıstri Baqyt Sultanov baıandama jasady.
Memleket basshysy óziniń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» jyl saıynǵy Qazaqstan halqyna Joldaýy aıasynda memlekettik organdardyń vedomstvoǵa qarasty uıymdaryn qysqartý esebinen keńeıtýmen jekeshelendirý josparyn iske asyrýdy jyldamdatýdy, sondaı-aq ákimshilik shyǵyndardy azaıtý úshin memlekettik organdardyń vedomstvoǵa qarasty uıymdardy múmkindiginshe shoǵyrlandyrýdy tapsyrdy.
«Qazirgi ýaqytta 2016-2020 jyldarǵa arnalǵan Jekeshelendirýdiń keshendi jospary 904 obektini qamtıdy. Olardyń 876 obektisi týraly tolyq aqparattar gosreestr.kz veb-portalyna shyǵaryldy. Bul tizimge qaıta qurylatyn jáne qaıta tirkeýden ótetin 28 respýblıkalyq menshik obektisi engizilgen joq», — dedi Baqyt Sultanov.
Eki jyl ishinde Keshendi jospardyń 476 obektisi saýda-sattyqqa shyǵarylyp, 164 mlrd teńge somaǵa 367-si satyldy. 2018 jyldyń 1 qańtaryndaǵy jaǵdaı boıynsha 255 obekti qaıta uıymdastyrylý jáne taratylý satysynda.
Qarjy mınıstriniń aıtýynsha, jalpy Jekeshelendirýdiń keshendi josparynyń oryndalýy 71% quraıdy.
2017 jyly saýda-sattyqqa shyǵarýǵa 463 obekti josparlanǵan. Jospar 97% oryndaldy: 289 obekti saýda-sattyqqa shyǵarylyp, onyń 190-y satyldy. 162 obekti qaıta uıymdastyryldy jáne taratyldy. 12 obekti aýyrtpalyqtarǵa baılanysty 2018 jylǵa aýystyryldy.
«Mınıstrlik usynǵan taldaý kórsetkendeı, obektilerdi ótkizý qarqyny jyldamdaǵanyn kórsetti. Osylaısha, 2017 jyly ótkizýshilik ótken kezeńdegi sáıkes kórsetkishten 15% asty. Satylǵan obektilerdiń baǵasy olardyń teńgerimdik qunynan 8%-ǵa asty. Burynǵydaı satýdyń negizgi ádisi aýksıon men tender bolyp qaldy – 73%», — dep málimdedi qarjy mınıstri.
Sondaı-aq, Baqyt Sultanov ótkizilip jatqan jekeshelendirýge qyzyǵýshylyq edáýir artqanyn atap ótti. Saýda alańyna belsendi kelýshiler sany 12% artty. Budan ózge, saýda-sattyqtaǵy básekelestik artty — bir saýda-sattyqqa qatysýshylardyń ortasha sany shamamen 4-5 quraıdy, al buǵan deıin olar 3-ten aspaıtyn.
Ulttyq ekonomıka mınıstri Tımýr Súleımenov óz kezeginde memlekettik menshiktegi iri obektilerdi jáne «Samuryq-Qazyna» UÁQ» AQ-nyń aktıvterin jekeshelendirý máseleleri turaqty negizde QR ekonomıkasyn jańǵyrtý máseleleri jónindegi memlekettik komıssııasynda qaralatynyn atap ótti.
Memlekettik komıssııanyń usynysy negizinde jekeshelendirýge jatatyn uıymdardyń tizbesi memlekettik menshiktegi bes uıymdy jáne «Báıterek» UBH» AQ-nyń bir obektisin alyp tastaý arqyly ózektendiriledi. Qazirgi ýaqytta QR Úkimeti qaýlysynyń sáıkes jobasy ázirlendi, qazir memlekettik organdarda kelisýde jatyr.
«Memleket basshysynyń tapsyrmalaryn oryndaý maqsatynda QR UEM barlyq múddeli taraptardyń qatysýymen memlekettik organdardyń baǵynyshty uıymdaryn tolyq túgendeý júrgizý úshin jumys tobyn qurady. Osylaısha, jekeshelendirýge jatatyn obektiler tizbesin jańartý boıynsha aldaǵy jumys Memleket basshysynyń tapsyrmalary sheńberinde júzege asyrylatyn bolady», — dedi Tımýr Súleımenov.
Jekeshelendirý júrgizý barysy boıynsha sondaı-aq «Samuryq-Qazyna» UÁQ basqarýshy dırektory Nurlan Rahmetov, «Báıterek» UBH basqarma tóraǵasynyń orynbasary Ǵalymjan Tájııaqov, «Qazagro» UBH basqarma tóraǵasy Nurlybek Málelov túsinikteme berdi.
Talqylaý qorytyndysy boıynsha Baqytjan Saǵyntaev memlekettik organdar men holdıngterdiń basshylaryna obektilerdi satý kestesin saqtaý qajettigi týraly eske salyp, olardy bekitilgen merzimderde ótkizýdi tapsyrdy. Premer-Mınıstr aıtyp ótkendeı Memleket basshysynyń jekeshelendirýdi júrgizý boıynsha tapsyrmasy 2018 jyldyń sońyna deıin oryndalýy tıis. Eshqandaı dálelder qabyldanbaıdy. Baqytjan Saǵyntaev jekeshelendirýdi júrgizý barysyn kim oryndap jatqanyn jáne kim qalyp kele jatqanyn kórsete otyryp, toqsan saıyn tekserýdi tapsyrdy.
Tapsyrmalardyń oryndalýyn baqylaý Premer-Mınıstrdiń orynbasary Erbolat Dosaevqa júkteldi.