Oblysta sońǵy úsh jylda 86 sport nysany iske qosyldy
Sportshynyń týa bitken daryny, qajyrly eńbegi, ýaqytpen sanaspaı jasaıtyn jattyǵaýlary arqasynda dittegen deńgeıden kórinetini belgili. Al, osynaý tutastyqty qoldap, qanattandyryp jiberý bıik jetistikterge jeteleýmen qatar, buqaralyq sporttyń da órisin keńitip, jurtshylyqty belsendilikke bastaıtyny anyq. Bul turǵydaǵy janashyrlyq úlgisin astanalyq oblystan kóptep tabýǵa bolady.
Oblys týrızm, deneshynyqtyrý jáne sportty damytýǵa 2010 jyly 2 mıllıard teńge bóldi. Bul – 2009 jylmen salystyrǵanda 18 paıyzǵa artyq. Eki-úsh jyldyń júzinde Kókshetaý qalasynda iri ámbebap sport saraıy, Sandyqtaý aýdanynda shańǵy-roller trassasy, Býrabaı aýdanynda respýblıkalyq shańǵy bazasy paıdalanýǵa berildi. Qazir qolda bar eki myńǵa jýyq sport nysandarynda jarystar kórigi qyzyp tur. Jylǵa tolmaıtyn ýaqytta 4 sport mektebin kúrdeli jóndeýge 80 mıllıon teńge jumsalsa, sport mekemeleriniń materıaldyq-tehnıkalyq bazasyn nyǵaıtý maqsatynda 29 mıllıon teńge qarjy ıgerildi. О́ńirdegi sport uıymdarynda 1500 birinshi razrıadty sportshy, 157 sport sheberligine kandıdat, 29 sport sheberi, 5 halyqaralyq dárejedegi sport sheberi daıarlansa, Qazaqstan tarıhyndaǵy aıryqsha oqıǵa Qysqy Azııa oıyndaryna qatysqan 5 sańlaq alty altyn, eki kúmis, úsh qola medalmen qýantty. Bul sporttyń buqaralyq sıpatyna da erekshe serpin bergenin atap ótý lazym. Qazirgi tańda deneshynyqtyrý jáne sportpen aınalysýshylar sany 114 myń adamǵa jetip, oblys turǵyndarynyń 16 paıyzyn qurady. Bıyl Kókshetaýdyń Buqpa taýyndaǵy shańǵy-roller jolyn, Qopa kólinde jelkendi qaıyq sportyn damytý maqsatynda ıaht-klýb, ashyq jáne jabyq tennıs korttarynyń qurylystary bastaldy. Salany damytýda bıznes ókilderi áleýmettik áriptestik qyzmetin óristetkenine rızashylyq bildirý qajet. «Egemen Qazaqstan» jýyrdaǵy sanynda «Logos Traıd» JShS dırektory, aýyl sharýashylyǵy ǵylymdarynyń doktory Ǵalym Qudaıbergenovtiń Astrahan aýdanyndaǵy Jaltyr aýylynyń turǵyndaryna ámbebap stadıondy tartý etkenin jazǵan edi. Al, Jaqsy aýdanynda qaladaǵydan kem emes sport keshenin ashyp, bokstan Qazaqstan chempıonyn tárbıelep shyǵarǵan Batyrbek Ýálıevtiń atymtaı jomarttyǵy el aýzynan túspeıdi. Jeke kásipker Batekeń bıyl Býrabaıda sport bazasynyń qurylysyn aıaqtap, onda el qurama komandasynyń bylǵary qolǵap sheberleri jattyǵýlar ótkizýde. Bıylǵy Sport forýmyna delegat bolyp qatysqan kásipker Erbol Toqaev Kókshetaý qalasynda «Qaırat» mamandandyrylǵan qazaq kúresi sport zalyn óz qarajatyna salyp berdi. Elge qyzmet etýdiń úlgi-qyrlaryn tanytyp otyrǵan Talǵat Áljanovtyń, Zýfar Serajıevtiń, Talǵat Temirǵalıevtiń, Igor Soıdyń eńbekterine de gúl bitsin degimiz keledi. Sóz sońynda, tamyzda, Qazaqstan Táýelsizdiginiń 20 jyldyq mereıtoıy qurmetine 64 jastaǵy Anatolıı Polıakov pen Temir Hamzın Kókshetaý qalasyndaǵy 6 shaqyrymdyq Buqpa kólin alǵash ret júzip ótkenin múbárak habar retinde jetkizgimiz keledi.Baqbergen AMALBEK.
Aqmola oblysy.