Elimizde kóp balaly analar sany boıynsha Ońtústik Qazaqstan oblysy kósh bastap tur. Búginde óńirde kóp balaly analar 98 600-den asty. Olardyń 3998-i «Batyr analar», 16361-i «Altyn alqa», 42 724-i «Kúmis alqa» ıegeri. Al, 6906 ana I-shi jáne II-shi dárejeli «Ana Dańqy» ordenimen marapattalǵan.
Ońtústik Qazaqstan oblysynyń ákimi J.Túımebaev qyz-kelinshekter men aıaýly analardy «8 naýryz – Halyqaralyq áıelder kúni» merekesimen quttyqtaý kezinde osyndaı derekter keltirdi. Ardagerler men zııaly qaýym ókilderi, oblystyq assambleıa ókilderi, oblys ákiminiń janyndaǵy áıelder isteri jáne otbasylyq – demografııalyq saıasat jónindegi komıssııa músheleri, oblystyń aýdan, qalalarynan túrli salada qyzmet etetin qyz-kelinshekter qatysqan saltanatty jıynda óńir basshysy úıdiń de, túzdiń jumysyn qatar alyp, qoǵamda aıryqsha belsendiligimen kózge túsip júrgen 33 áıeldi marapattady.
Onyń 5-ine «Oblysqa sińirgen eńbegi úshin» belgisi berilse, 14-ine Ońtústik Qazaqstan oblysy ákiminiń Gramotasy, 9-y oblys ákiminiń Alǵys haty tabys etildi. Al, 5 ananyń keýdesine «Altyn alqa» tósbelgisi taǵyldy. Sondaı-aq, ákim saltanatty sharaǵa kelgen basqa da qyz-kelinshekterge syı-sııapat jasady.
Sondaı-aq, názik jandylarǵa arnaıy aq dastarhan jaıylyp, «Áıel – ana – ómirdiń ózegi» atty konserttik baǵdarlama uıymdastyryldy.
Ǵalymjan ELShIBAI,
«Egemen Qazaqstan»