Osynaý óner festıvali talaı talanttyń jolyn ashty. Mysaly, Mádenıet qaıratkeri, ánshi Jubanysh Jeksenuly, Sáken Maıǵazıev, Kenjebek Janábilov syndy elimizge tanymal ónerpazdar «Teriskeı talanttary» baıqaýynan qanat qaqty.
Ońtústik Qazaqstan oblysy, Sozaq aýdanynyń 90 jyldyǵyna jáne Astananyń 20 jyldyǵyna oraı, ıaǵnı 1998 jyly bastaý alǵan «Teriskeı talanttary» halyqtyq óner festıvali bıyl 20-shy ret uıymdastyrylyp otyr. «Myńjylqy» mádenıet saraıynda. Festıvaldi Sozaq aýdanynyń əkimi Salyhan Polatov quttyqtaý sózben ashyp, Q.Dosymbekovtiń sózine jazylǵan S.Batyrbekovtiń «Teriskeı talanttary» əniniń tusaýy kesildi. Aýyldyq jerlerdegi jas talanttardy taýyp, olarǵa qoldaý kórsetýdi, otansúıgishtikke baýlýdy kózdegen festıvalǵa qatysýshylar segiz janr boıynsha synǵa túsedi. Iаǵnı, «Syrly saz áýenderi» – estrada janry boıynsha, «Zerli qalam» – beıneleý óneri qylqalam sheberleri, «Kúmis kerýen» – qolóner sheberleri, «Syrly dúnıe» – jyr músháırasy jáne kórkemsóz oqý, «Gaýhartas» – halyq ánderi, «Sáýkele» – bı, «Sahna ıirimi» – drama janry, sondaı-aq «Halyq – óner qaınary» ujymdyq kórkemónerpazdar baıqaýy arqyly talanttar anyqtalmaq. Festıvaldiń ashylý saltanaty «Mereıińmen, týǵan el!» atty ádebı júzdesýge ulasyp, teriskeıde týǵan Eskermes Jaqsymbetov, Esenbek Kenjeǵaraev, Myńjasar Asqarov syndy aqyndar óleńderin oqyp, aýdan ənshileri elimizde keńinen tanylyp úlgergen ənderin oryndady.
Atap aıta ketelik, qara kúzge deıin sozylatyn festıvaldiń júlde qoryna aýdan əkimdigi tarapynan 2 mıllıon 500 myń teńge taǵaıyndalǵan. Jeńimpazdar qorytyndy gala-konsertte marapattalady.
Sondaı-aq shara barysynda «Halyq – óner qaınary» atty ujymdyq kórkemónerpazdar baıqaýynyń júldegerleri aýdan ortalyǵynda arnaıy konserttik baǵdarlamasyn ótkizedi.
Ǵalymjan ELShIBAI,
«Egemen Qazaqstan»
Ońtústik Qazaqstan oblysy