Qazaq ulttyq agrarlyq ýnıversıtetinde «Ekologııa» kafedrasynyń aǵa oqytýshysy, áýesqoı sýretshi Jumadilhan Kerimbektiń «Týǵan elim» atty jeke shyǵarmashylyq kórmesi ótti.
Bir ǵajaby, Jumadilhan bul salada arnaıy bilim almaǵan. Búkil sanaly ǵumyryn ǵylymǵa arnady. Atap aıtsaq, Qazaq aýylsharýashylyq ınstıtýtynyń agronomııa fakýltetin úzdik bitirgen ol mamandyǵy boıynsha biraz ýaqyt Jambyl oblysynyń Jýaly aýdanynda jumys istedi. Qazirgi kezde Qazaq ulttyq agrarlyq ýnıversıtetinde «Ekologııa» kafedrasynyń aǵa oqytýshysy. Kerimbek Túrkııadaǵy Seljýk ýnıversıtetinde bilimin jetildirip, jaratylystaný ǵylymdarynyń fılosofııa doktory (PhD) atandy.
– Jas urpaqqa agrarlyq bilim berý baǵytynda ustazdyq joldy tańdap, ǵylymmen aınalysyp júrgen Jumadilhan Sarybaıuly – boıyndaǵy sýretshilik darynymen kópshilikti tańǵaldyryp kele jatqan qylqalam sheberi. Shyǵarmashylyq jumystary kásibı sýretshilerdiń týyndylarynan esh kem soqpaıtyn tabıǵı talant ıesi ýnıversıtet qabyrǵasyndaǵy jeke kórmesine otyzdan astam tańdaýly eńbekterin qoıǵan. Sýretshi týyndylarynyń taqyryby ár alýan. Avtordyń «Aýylda», «Terezedegi tań», «Ákemniń portreti», «Bulaq basynda», «Tynyshtyq», «Dala» syndy kartınalary zer salyp qaraǵan kez kelgen adamdy súısindirmeı qoımaıdy, – deıdi aqyn Almat Isádil.
100-den astam kórkemsýret týyndylarynyń avtory Jumadilhan Kerimbek birneshe respýblıkalyq jáne qalalyq kórmelerge qatysty. О́ner ıesiniń birneshe grafıkalyq jumystary Túrkııa, Belarýs elderinde tanylyp, maıly boıaýmen salynǵan sýretteri elimizdegi ónersúıer qaýym men jeke kolleksıonerler tarapynan joǵary baǵalandy.
Ǵalym SÚLEIMEN,
«Egemen Qazaqstan»
ALMATY