Prezıdent arhıvinde «Qazaqstan Respýblıkasynyń memlekettik bılik organdary» atty anyqtamalyq jaryq kórdi. Úsh jyldan asa ýaqyt boıy daıyndalǵan eńbekte eldiń táýelsizdik jyldarynan bastap búgingi ınstıtýsıonaldyq reformalarǵa deıingi memlekettik basqarý qurylymynyń evolıýsııasy qamtylǵan.
Qujattyq hronıka 800 betten, úsh taraýdan turady. Prezıdent arhıviniń dırektory Álııa Mustafına basylym arhıvshiler men ǵalymdardyń birneshe jyldyq eńbeginiń nátıjesi ekenin atap ótti.
«Qujattyq turǵydan tekserilgen, shynaıy aqparat kózi bola alatyn anyqtamalyq basylymdy daıyndaý jumysy birneshe jylǵa sozyldy. Munda tek 1991 jyldan bergi memlekettik mekemelerdiń tarıhy ǵana emes, sonymen qatar memlekettik basqarý ınstıtýttarynyń evolıýsııasy, saıası sheshimder qabyldaý tetigi men algorıtminiń kórinisi berilgen. Basylymnyń elde balamasy áli joq dep nyq senimmen aıta alamyn. Bul – Prezıdent arhıvinde qyzmet etetin arhıvshi-praktıkter men ǵalymdardyń shyǵarmashylyq odaǵynyń, túrli memlekettik organ ókilderiniń eńbeginiń nátıjesi», dedi Á.Mustafına.
Anyqtamalyq – Prezıdent arhıvi daıyndaǵan serııanyń tórtinshi basylymy. Buǵan deıin 2004, 2007, 2012 jyldary úsh nusqasy jaryq kórdi. Jańa basylym barlyq aldyńǵy býyndardy biriktirip, 1991–2024 jyldar aralyǵyndaǵy kezeńdi qamtıdy.
«Basylymnyń erekshe qundylyǵy – Prezıdent arhıviniń qorlary. Memlekettik organdardyń qurylýy, qyzmeti, qurylymy, ókilettikteri, sondaı-aq qaıta uıymdastyrylýy nemese joıylýy týraly qysqasha, biraq tarıhı deregi naqty, vedomstvolardyń baǵynystylyǵy men ishki qurylymyndaǵy ózgeristeri tolyq berildi. Mundaı jınaqty kópshilikke júıeli túrde úlken tırajben qazaq, orys tilinde birinshi ret jınap otyrmyz», dedi Prezıdent arhıvi dırektorynyń orynbasary Qaırat Álimǵazınov.
Kitap tanystyrylymyna memlekettik organdar men ǵylymı qaýymdastyq ókilderi qatysty. Sonyń ishinde Májilis depýtaty Erkin Ábil, Memlekettik qyzmet isteri agenttigi tóraǵasynyń orynbasary Álibek Ahmedıar, Prezıdent janyndaǵy Memlekettik basqarý akademııasynyń rektory Azamat Jolmanov bar. Olar basylymǵa joǵary baǵa berdi.
Saıası ǵylymdar doktory, professor Jomart Sımtıkov anyqtamalyqtyń atqarýshy bılik organdary tarıhyna ǵylymı baǵyttalǵan navıgator rólin atqaratynyn aıtty.
«Bul jınaq ǵylymı mánge ıe, sebebi ol memlekettik basqarý tarıhyna qatysty júıelengen qujattar massıvin ǵylymı aınalymǵa engizedi, ákimshilik reformalardyń tarıhyn zertteýdi damytady, saıası tarıh, quqyqtaný, arhıvtaný salasynda empırıkalyq baza bola alady,» dedi sarapshy.
Byltyr Prezıdent arhıvi alty qujat jınaǵyn, «Jańa arhıv» jýrnalynyń tórt sanyn oqyrman nazaryna usyndy. Táýelsizdik jyldary Arhıv el tarıhyndaǵy mańyzdy oqıǵalarǵa arnalǵan shamamen 90 qujattyq basylymdy daıyndaǵan. Olardyń qatarynda saıası qýǵyn-súrginge ushyraǵan azamattardan bastap eldiń qazirgi damý kezeńine deıingi derekter bar.