Májilistiń Agrarlyq máseleler komıtetinde «QR keıbir zańnamalyq aktilerine topyraqty qorǵaý máseleleri boıynsha ózgerister engizý týraly» zań jobasyna qatysty jumys tobynyń keńeıtilgen otyrysy ótti. Jıynnyń negizgi taqyryby aýyl sharýashylyǵy jerlerin berý tetigin elektrondyq konkýrstarǵa kóshirýge baǵyttalǵan túzetýlerge arnaldy.
Májilis depýtaty, jumys tobynyń jetekshisi Nurjan Áshimbetov túzetýler Úkimet tarapynan Memleket basshysynyń 2025 jylǵy 8 qyrkúıektegi Qazaqstan halqyna Joldaýynda aıtylǵan tapsyrmany oryndaý aıasynda ázirlengenin eske saldy.
Otyrys kezinde úkimettik túzetýlerdi Aýyl sharýashylyǵy vıse-mınıstri Azat Sultanov tanystyrdy. Onyń aıtýynsha, usynylyp otyrǵan ózgerister aýyl sharýashylyǵy jerlerin berý tetigin sıfrlyq formatqa kóshirýdi kózdeıdi jáne rásimderdiń ashyqtyǵyn arttyrýǵa baǵyttalǵan. Atap aıtqanda, Jer kodeksiniń birqatar normalary jańa redaksııada usynylady.
«Túzetýlerdiń negizgi maqsaty – jer komıssııalarynyń fýnksııalaryn joıý jáne tolyqtaı elektrondyq formatqa kóshý arqyly aýyl sharýashylyǵy jerlerin bólýdiń ashyqtyǵyn qamtamasyz etý. Bul rette Kodekstiń negizgi normalary saqtalady. Kodekste burynǵysynsha jer paıdalanýshylardyń bazalyq mindetteri qarastyrylady, ol sondaı-aq ball túrindegi qosymsha artyqshylyqtardyń berilýine kepil bolady», dedi vıse-mınıstr.
Konkýrstardy memlekettik múlik tiziliminiń veb-portalynda ótkizý josparlanyp otyr. Barlyq rásim ótinim berýden bastap, jeńimpazdy aıqyndaýǵa deıin tolyq avtomattandyrylady.
Jańa tetik konkýrstardy ótkizý merzimin 90 kúnnen 45 kúntizbelik kúnge deıin qysqartýdy, konkýrsqa bıznes-jospar men usynys ázirlemeı-aq proaktıvti formatta qatysýdy, sondaı-aq jeńimpazdy avtomattandyrylǵan júıe arqyly aıqyndaýdy kózdeıdi. Budan bólek, «qosymsha jeńimpaz» tetigi engizilip, jalǵa alý shartyn jasasýdan jaltarǵan tulǵalarǵa shekteýler belgilenedi.
Talqylaý barysynda depýtattar usynylyp otyrǵan normalardy iske asyrýǵa qatysty birqatar tájirıbelik máseleni kóterdi. Atap aıtqanda, zań jobasyndaǵy termınologııany naqtylaý, jer sanattaryn baǵalaý, ýchaskelerdiń kadastrlyq qunyn ózgertý máseleleri qaraldy. Sondaı-aq jergilikti atqarýshy organdardyń konkýrstar ótkizýge daıyndyǵy, onyń ishinde ınfraqurylymnyń, kadrlyq áleýettiń jáne sıfrlyq platformanyń ázirlik deńgeıi, sondaı-aq jańa tetikti engizý kezindegi yqtımal syn-qaterler men shekteýler talqylandy. Budan bólek, aýyl sharýashylyǵynyń maýsymdyq jumysy eskerile otyryp, konkýrs merzimin qysqartý, ball berý tártibi jáne «bastaýshy kásipker» uǵymyn aıqyndaý máselelerine erekshe nazar aýdaryldy.
Otyrysqa Májilis depýtattary, ortalyq memlekettik organdar, «Atameken» Ulttyq kásipkerler palatasy, salalyq uıymdary jáne jergilikti atqarýshy organdardyń ókilderi qatysty.