Jáńgir han atyndaǵy Batys Qazaqstan agrarlyq-tehnıkalyq ýnıversıtetinde «Rýhanı jańǵyrý» baǵdarlamasy aıasynda Qazaqstan halqy Assambleıasynyń bastamasymen «National bookdating» aksııasy ótti.
Bul «Jańa gýmanıtarlyq bilim» jáne «100 jańa oqýlyq» jobasyna jastardyń nazaryn aýdartý, memlekettik tilge aýdarylǵan álemdik deńgeıdegi bestseller atanǵan oqý quraldary men oqýlyqtardy tanytý maqsatynda ótkizilgen shara.
«Rýhanı jańǵyrý» baǵdarlamasy aıasynda elimizde gýmanıtarlyq bilim jáne áleýmettik-ekonomıkalyq salada 18 álemdik oqýlyq memlekettik tilge aýdarylǵany belgili. Bul eńbekter əlemniń 42 elinde, 34 tilde basylyp, jalpy taralymy 47 mıllıonnan asqan eken. Endi mine, sol maqtaýly oqýlyqtar qazaq oqyrmandarynyń da qolyna tıdi. Jaqyn kúnderi Jáńgir han atyndaǵy Batys Qazaqstan agrarlyq-tehnıkalyq ýnıversıteti kitaphanasyna da bul kitaptar kelip, stýdentterdiń ıgiligine aınalady.
Aksııa barysynda Batys Qazaqstan oblystyq Qazaqstan halqy Assambleıasy tóraǵasynyń orynbasary, hatshylyq meńgerýshisi Ǵaısa Qapaqov, ýnıversıtettiń professory, fılosofııa ǵylymdarynyń doktory Tilekjan Rysqalıev, «Qazaqstan tarıhy jáne áleýmettik-gýmanıtarlyq pánder» kafedrasynyń meńgerýshisi, fılosofııa ǵylymdarynyń kandıdaty Venera Esenǵalıeva, ekonomıka jáne menedjment kafedrasynyń meńgerýshisi, ekonomıka ǵylymdarynyń kandıdaty Janar Erjanova memlekettik tilge aýdarylǵan kitaptar men oqýlyqtar týraly baıandady. Ýnıversıtettiń tárbıe jáne áleýmettik jumystar jónindegi prorektory Aqylbek Sultanov memlekettik tilge aýdarylǵan oqýlyqtar otandyq ǵylymnyń damýyna jəne bilim berý isiniń odan əri jetilýine úlken úles qosatynyn atap ótti.
- Elbasymyz N. Nazarbaevtyń ár bastamasy jastardy damytýǵa, qoldaýǵa baǵyttalǵan. «Rýhanı jańǵyrý» baǵdarlamasynyń «Qazaq tilindegi 100 jańa oqýlyq» jobasy aıasynda jaryq kórgen jańa kitaptar – jastarǵa jasalǵan qamqorlyqtyń biri dep bilemin. Mundaı oqýlyqtardy memlekettik baǵdarlama aıasynda aýdaryp, tegin taratý – əlemde balamasy joq təjirıbe dep oılaımyn, - dedi BEK-21 tobynyń stýdenti, bolashaq ekonomıst Baǵdat Serikbaeva.
Ǵaısa Qapaqovtyń aıtýynsha, jańa oqýlyqtardyń árqaısysy 10 myń tırajben basylyp, elimizdegi barlyq memlekettik joǵary oqý oryndaryna tegin taratylady. Sóıtip, jaz boıy JOO oqytýshylary jańa eńbektermen tanysyp, qarýlanady. Osylaısha 2018 jyly qyrkúıek aıynda jańa oqý jylynan oqý úderisine tolyq engiziledi. Taǵy bir aıta ketetin jáıt, bul aýdarma kitaptar Ulttyq aýdarma bıýrosynyń saıtynda da jarııalanbaq. Iаǵnı, «100 jańa oqýlyq» baǵdarlamasynyń ıgiligin kez kelgen adam kóre alady.
– Bul baǵdarlama toqtamaıdy. Bıyldyń ózinde batys fılosofııasynyń tarıhy, lıngvıstıka, semıotıka, jańa pedagogıka, halyqaralyq quqyq, dıplomatııa, jýrnalıstıka, óner tarıhy boıynsha taǵy 30 kitap pen oqýlyq ózge tilderden aýdarylady, - deıdi Ǵ aısa Hamedollauly.
– Derek Djonstonnyń «Fılosofııanyń qysqasha tarıhy» eńbegi óte qyzyqty. Fılosofııa syndy kúrdeli pándi óte qyzyqty ári tartymdy etip túsindirgen tamasha eńbek. Bul shyǵarma stýdentter men jasóspirimder úshin óte qyzyqty dep oılaımyn. Munda Sokrattan Derrıdke deıingi álemniń eń myqty 18 oıshylynyń ómirbaıany men negizgi eńbekteri berilgen. Derek Djonston fılosofııa tarıhyn qarapaıym tilmen qyzyqty etip jetkize bilgen. Nemese Karen Armstrongtyń «Qudaı tarıhy» kitabyn alaıyq. Bul eńbekte avtor Ibrahım paıǵambardyń zamanynan kúni búginge deıin erler men áıelderdiń Qudaı taǵala týraly tanym-túsinigi qandaı bolǵanyn taldaıdy. Aıta keteıin, bul kitap álem boıynsha 700 myń tırajben taraǵan, – deıdi Jáńgir han atyndaǵy Batys Qazaqstan agrarlyq-tehnıkalyq ýnıversıteti «Qazaqstan tarıhy jáne áleýmettik-gýmanıtarlyq pánder» kafedrasynyń meńgerýshisi, fılosofııa ǵylymdarynyń kandıdaty Venera Esenǵalıeva.
Qazbek QUTTYMURATULY,
«Egemen Qazaqstan»
Oral qalasy
Sýretti túsirgen Qarakózaıym Kenjına