Ońtústik Qazaqstan oblysy Túlkibas aýdanynda 2025 jylǵa deıin jyl saıynǵy týrıster sanyn 20 myńnan asyrý josparlanýda. Al ótken jyly 12 myńnan astam týrıst kelgen, onyń 7 paıyzy shetel azamattary.
Josparlanǵan mejege jetý maqsatynda jalpy quny 347 mln. teńgeni quraıtyn "Jaılaý" emdeý-saýyqtyrý ortalyǵy salynady. Syıymdylyǵy 100 oryndyq ortalyqta 50 jumys orny ashylyp, 2000 týrıst qamtylmaq. Sondaı-aq, «Saýmalmen emdeý ortalyǵy» qyzmet kórsetetin bolady. Aqsý ózeni shatqalynda, ıaǵnı Iirsý eldi mekenine 8 shaqyrym jerde teńiz deńgeıinen 1500 metr bıiktikte ornalasqan jerde tabıǵatty tamashalaý alańy qurylmaq. Jobalardy 2019 jyly iske qosý josparlanyp otyr.
OQO óńirlik kommýnıkasııalar qyzmetinde ótken brıfıngte osyndaı jobalardy jarııa etken Túlkibas aýdanynyń ákimi Nurbol Turashbekov bıyl jalpy óńirlik ónim mejesin 70 mlrd. teńgege jetkizý josparlanyp otyrǵanyn málim etti. «Aýdanǵa byltyr 18 mlrd. 206 mln. 500 myń teńge ınvestısııa tartylsa, ónerkásip kásiporyndary 22 mlrd. 682 mln. 671 myń. teńgeniń ónimin óndirgen. Aýdan boıynsha belsendi shaǵyn kásipkerlik sýbektilerdiń sany 6310 birlikke jetip, óndirilgen ónim kólemi 34,2 mlrd. teńgeni qurady. Al salyq tólemderi 272,6 mln. teńgege jetip, 2,7 paıyzǵa artty», - dedi N.Turashbekov.
Sondaı-aq, aýdanda «Údemeli ındýstrıaldy-ınnovasııalyq damý» baǵdarlamasy aıasynda «О́ńirler kásipkerligin qoldaý kartasyna» quny 99,4 mlrd. teńgelik 10 joba engen. Búgingi tańda quny 1,2 mlrd. teńgelik 3 joba júzege asqan. 2018-2020 jyldary jalpy quny 98,2 mlrd teńgeni quraıtyn 7 joba iske qosylyp, 3500-ge jýyq jańa jumys orny ashylady dep kózdelýde.
Erkin DOSYMBAI,
Ońtústik Qazaqstan oblysy