«QazMunaıGaz» UK AQ úshin elimizdiń áleýmettik damýyna atsalysý, tarıhı-mádenı qundylyqtardy qamqorlyqqa alý baǵytyndaǵy ister kún tártibinen túsken joq. Mańǵystaý óńirindegi eskertkishterdiń jańǵyrýyna buǵan deıin de óz úlesin qosqan kompanııa munaıshylary bıyl da óz baǵyt-baǵdarlarynan jańylmaı, jarqyn isterdiń jarshysy bola bildi.
Mamyr aıynyń 19-y kúni Mańǵystaýda kúnniń ystyǵy +35° boldy. Aptapty kúnderde dala tósinde jumys isteýge ábden mashyqtanǵan munaıshylar aýa raıynyń bul «minezine» mán bermeı, Aqtaý qalasynan 230 shaqyrym qashyqtyqqa jolǵa shyqty. Sapardyń maqsaty – «Ústirt eskertkishterine – el taǵzymy!» atty korporatıvtik is-sharany ótkizý bolatyn. Aksııa aıasynda atalmysh kompanııaǵa qarasty 23 kásiporyn aımaqtaǵy memleket qorǵaýynda turǵan 28 tarıhı jáne mádenı, ádet-ǵuryptyq nysandardy óz qamqorlyǵyna aldy. Olardyń arasynda jalpy jurtshylyqqa tanymal oryndarmen birge, tarıhı dáýiri, sondaı-aq atqarǵan qyzmetine baılanysty mańyzdy bolǵanmen, tanymaldyǵy joǵary emes nysandar da bar.
Mamyr aıynyń alǵashqy kúnderinde bastalǵan bul aksııaǵa Mańǵystaýdaǵy barlyq ken oryndary men servıstik kompanııalar jumyldy – árqaısysy ár eskertkishke arnaıy baryp, senbilik-tazartý jumystaryn júrgizip, áktep, syrlap, sharbaq salyp, sý tartyp, túneýhanalarǵa jóndeý júrgizdi. Mysaly, 5 mamyr kúni «О́zenmunaıgaz» AQ jastar keńesi «Babalar júrgen izbenen» sanıtarlyq avtoekspedısııasymen jolǵa shyǵyp, 45 jas munaıshy eki kún boıy Aıraqty jáne Sherqala taýlaryna, Samal baqshasyna, Aqmysh oazısine, Shaqpaq ata jáne Sultan ene jerasty meshitterine baryp, abattandyrý, tazalap qoqystan aryltý baǵytynda qajetti jumys kólemin anyqtady. Bardy baǵalap, tarıhı qundylyqtardy qasterleý sharasy týǵan el tarıhyn tanımyn degen jastar úshin tanymdyq sapar bolýmen qatar, el jastarynyń otansúıgishtik, eljandylyq rýhyn qalyptastyratyny belgili. Budan basqa «QazMunaıGaz» kompanııasy ujymdarynan quralǵan 1500-den astam munaıshy bir aı boıy Qaraýylkúmbet, Uzyntam, О́mir, Qyzan, Qoshaq, Mahmýt baba, Sısem ata, Oǵylandy, ózge de birneshe nysandarǵa baryp, jol kórsetkishterin ornatty, qorǵanysh taqtalary men sharbaqtar salyp, keń aýqymda sanıtarlyq tazalyq jumystaryn júrgizdi. Nysandardyń tarıhı mańyzyn áńgimelep, munaıshylarǵa tanymdyq turǵyda maǵlumat berý úshin ólketanýshy mamandar ilesip, sapar sáni men mánin arttyra tústi.
Biz kýá bolǵan saparda «Mańǵystaýmunaıgaz» AQ munaıshylary – «Jas mamandar» keńesi músheleri aldymen «Qyzylqala» qalashyǵynyń qazba jumystary júrgizilgen ornynda bolyp, tazalap, qoqystardy jınady. Odan ári Bozashy boıyndaǵy Beket atanyń Tobyqty jerasty meshitine baryp, óz jumystaryn jalǵastyrdy. Qazirgi tańda Beket atanyń namaz oqyp, shákirtter oqytqan meshitter sany beseý desek, onyń úsheýi Mańǵystaýda ornalasqan. Osy úsh meshittiń biri – Tobyqty. XVIII-XIX ǵasyrlardyń qoltańbasy sanalatyn meshit «Mańǵystaýmunaıgaz» AQ munaıshylary kúshimen jańaryp, jańǵyryp keledi. Munaıshylar tarıhı orynǵa qorshaý salyp, qonaqúı jáne ǵıbadat bólmesin salý boıynsha jumystar júrgizýmen birge, elektr jaryǵyn jáne sý qubyryn tartyp bergen. Sý bar jerge 600 túpten astam aǵash otyrǵyzyp, kún shaqyraıyp, aptap urǵan aımaqtaǵy túneýhana mańyn jasyl jelekke orantyp qoıypty. Bul týraly meshit shyraqshysy qýana aıtyp, munaıshylarǵa alǵysyn jetkizdi.
– Biz Elbasymyzdyń saıasatyna ún qosýdy, onyń halyqty rýhanı jańǵyrtý baǵytyndaǵy baǵdarlamasyna, sondaı-aq el ekonomıkasyn arttyrýǵa, Qazaqstandy damyǵan aldyńǵy qatarly elderdiń qataryna qosýǵa negizdelgen barsha strategııalyq bastamalaryna qoldaý kórsetýdi azamattyq paryz sanaımyz. Búgingi 560 shaqyrym joldy artqa tastap, «Qyzylqala» qalashyǵyna jáne Tobyqty jerasty meshitine baryp jasaǵan senbilik jumystarymyz – jospardaǵy kóp isterdiń biri ǵana. Aldaǵy ýaqytta «QazMunaıGaz» kompanııasynyń basshylyǵymen, jergilikti jerdegi kompanııalardyń júzege asyrýymen jaqsy ister jalǵasyn tabady dep oılaımyn, – deıdi sapar sońynda «Mańǵystaýmunaıgaz» AQ «Jas mamandar» keńesiniń tóraǵasy Baýyrjan Qojaev.
Qıyn kezde el ekonomıkasynyń aıaqtan turýyna qoldaý kórsetken qurysh bilek munaıshylardyń tarıhı nysandardy qamorlyqtaryna alyp, áleýmettik saladan alshaq ketpeýi qýantady. Halqyn qoldap, babalaryn ardaqtaǵan munaıshylardyń isi kópke úlgi, kóńilge ystyq. «О́li rıza bolmaı, tiri baıymaıdy» degen támsilge súıensek, ótkenin qasterlep, keleshegin qamdaǵan eldiń erteńi osal bolmaýy tıis.
Gúlaıym ShYNTEMIRQYZY, «Egemen Qazaqstan»
Mańǵystaý oblysy