N.Pogodın atyndaǵy orys drama teatrynda aýyl sharýashylyǵy qyzmetkerleri kúnine arnalǵan saltanatty jıyn ótti. Onda oblys ákiminiń birinshi orynbasary Aıdarbek Saparov baıandama jasap, aýyl sharýashylyǵy salasyndaǵy jetistikter men aldaǵy mindetterdi jan-jaqty saralap berdi. Qyzyljar óńiriniń dıqandary eginshilik salasynda buryn-sońdy bolmaǵan tabystarǵa jetti. 8,8 mıllıon tonna astyq jınap, el Táýelsizdiginiń 20 jyldyǵyna tartýlady. Mal sharýashylyǵy da órkendep keledi. Alqaly basqosýda Qazaqstannyń Eńbek Erleri Gennadıı Zenchenko, Rýslan Moldabekov, Ǵ.Músirepov aýdanynyń ákimi Marat Tasmaǵambetov, taǵy basqalar sóılep, áriptesterin kásibı merekemen quttyqtady.
«Oraq-2011» naýqanynyń qorytyndysy jarııa etilip, gektar ónimdiligin 28,2 sentnerden aınaldyrǵan Tımırıazev aýdany jeńimpaz dep tanyldy. Oǵan «Taıota-Land Krýızer» jeńil kóligi tabys etildi. Ekinshi, úshinshi oryndardy Qyzyljar jáne Esil aýdandary bólisti.
О́mir ESQALI,
Soltústik Qazaqstan oblysy.