Elshi – qaıratker, elshil – qalamger, belgili túrkitanýshy ǵalym Ádil Ahmetovtiń jańa jınaǵynyń saltanatty tusaýkeseri ótti. «Ǵasyr ǵıbraty» dep atalatyn bul eńbekte avtordyń egemen elimizdiń álemdik geosaıasattaǵy dara jolyn kórsetetin saraptamalyq maqalalary toptastyrylǵan.
Taǵylymdy sharaǵa Parlament Májilisiniń depýtaty Saýytbek Abdrahmanov, kórnekti memleket jáne qoǵam qaıratkeri О́mirbek Baıgeldı, Qazaqstan Respýblıkasy Prezıdentiniń Baspasóz hatshysynyń orynbasary Baýyrjan Omarov, sondaı-aq akademık Seıit Qasqabasov, qyrǵyzstandyq belgili túrkolog Qadyráli Qońqabaev, Rýhanı jańǵyrý mádenı ortalyǵynyń dırektory Gúltas Qurmanbaı syndy kórnekti ǵalymdar men jýrnalıster qatysty.
Jıyndy ashqan «Egemen Qazaqstan» RG» AQ basqarma tóraǵasy Darhan Qydyráli atalǵan kitaptyń jahandanǵan álemniń geosaıası kelbetin aıshyqtaıtyn jastarǵa baǵyt berer shamshyraq ispetti taǵylymdy eńbek ekenin atap ótti. «El aǵasy Ádil Ahmetovtiń «Ǵasyr ǵıbraty» atty eńbegindegi maqalalardyń basym kópshiligi eń aldymen bas basylym «Egemen Qazaqstan» arqyly jurtshylyqqa jol tartqan, oqyrmanmen qaýyshqan. Búgingi kitap tusaýkeseriniń qazaq baspasóziniń ustahanasy, el gazeti «Egemende» ótýiniń osyndaı máni bar. Kitaptyń kópshilikke keńinen nasıhattalýy jas dıplomattar men saıasattanýshylar, ǵalymdar úshin orta toltyrar olja boldy», dedi Darhan Qydyráli.
Kitapta Batystyń Shyǵysty moıyndaýy, Sıngapýr elin bıik beleske kótergen Lı Kýan Iý taǵylymy, Tom Batler-Boýdonnyń «Ǵumyryńyzdy ózgertýge serpindi shabyt syılaıtyn klassıkalyq 50 kitap» atty kitaby keń qamtylǵanyn aıtqan Ádil Qurmanjanuly álemdik dıplomatııa men halyqaralyq qatynastardyń búgingi jaıy tereń saraptalǵan týyndyny el ıgiligine arnap otyrǵanyn tilge tıek etti.
«Jahandyq geosaıasattyń búgingi bolmys bitimi, ondaǵy Qazaqstannyń dara joly jáne musylman álemi degen úsh negizgi taraýdan turatyn kitapta qazirgi qubylmaly geosaıasat, kósh basynda turǵan Amerıkanyń jaǵdaıy, Qytaı men Eýropa, Sıngapýrdy basqarýdyń tıimdi úlgisin izdeý jolyndaǵy qurylymy jóninde paıymdamalar bar. Álemdik saıasattyń suńǵylalary – Zbıgnev Bjezınskıı, Genrı Kıssındjer, Djozef Stıglıs, Djeremı Rıfkın syndy sańlaqtardyń kitaptaryn súzip shyǵyp, sonyń sıntezin óz elimizge paıdasy tıer-aý degen maqsatpen toptastyrdym», dedi Ádil Ahmetov. О́z kezeginde sóz alǵan О́mirbek Baıgeldı jalpyadamzattyq oılardy ortaǵa salǵan irgeli eńbektiń zárý taqyryptardy qozǵaýymen dáýirler múmkindigin salystyrǵan jahandyq ahýal jaıynan syr sherter qundy, týyndy ekenin alǵa tartty.
Jalpy, sany 43 maqaladan turatyn bul kitapta elimizdiń jańa tarıhy men onyń erteńine degen avtordyń salıqaly, tereń kózqarasy aıqyn kórinedi. Jahandyq tártiptiń dúrbeleńinde kez kelgen tyǵyryqtan jol taýyp, kedergini múmkindikke, táýekeldi tabysqa aınaldyryp, jeńis pen jetistikke jasqanbaı umtylǵan ulttyq memleketter men ekonomıkanyń tabysty tájirıbesiniń artyqshylyǵyn oqyrmanǵa elep, ekshep usynǵan eńbek. 500 danamen jaryq kórgen kitaptyń elektrondy nusqasy «Egemen Qazaqstan» gazetiniń saıtyna ornalastyrylǵan.
Aıa О́MIRTAI,
«Egemen Qazaqstan»