El mereıtoıy qarsańynda jan jadyratqan jańalyqtardyń biri – Qytaı elimen ekonomıkalyq baılanysty jalǵastyrǵan «Dostyq – Alashańqaı» shoıyn joly ótetin Dostyq kentindegi kedenshiler qýanyshy deýge bolady.
«Dostyq» kedenine basqa óńirlerden qyzmet aýystyrǵandar men buǵan deıin baspanaǵa zárý otbasylary qys qahary kúshine engen osy kúnderi jyly páterlerdiń kiltin aldy.
Kóp qabatty jıyrma páterden turatyn úıdiń qurylysyn «NMS» kompanııasy barlyq talaptarǵa saı sapaly aıaqtap, paıdalanýǵa berdi. Jańa baspanany ıelengender qatarynda jas mamandar jáne basqa da óz isiniń kásibı sheberleri bar.
Kedenshiler qalashyǵy ýaqyt ótken saıyn sáýlettenip, qanatyn keńge jaıýda. Paıdalanýǵa berilgen úılerdiń jertólesinde turǵyndardyń salamatty ómir saltyn qalyptastyrýyna arnalǵan jattyǵý zaly jasaqtalǵan. Balalardyń oıyn alańy da aýlaǵa sán berip, búldirshinder qyzyǵymen tolyqqan.
Táýelsizdik merekesin jańa shańyraqta qarsy alǵandardyń kóńil-kúıleri de kóterińki. Demek, bul olardyń qyzmettegi tabysty eńbegine barlyq jaǵdaı jasalǵanynyń dáleli.
Kúmisjan BAIJAN,
Almaty oblysy.