Azattyq tańyna arnaldy

Elbasy Nursultan Nazarbaev: «Biz búgingi beıbit tirligimiz úshin, Qazaqstan dep atalatyn Respýblıkanyń jer betinde barlyǵy úshin ta­rıh­tyń ár tusynda osy eldi, osy jerdi qor­ǵaǵan qaısar jandardyń arýaǵynyń aldynda qashanda qaryzdarmyz» degen edi. Shynynda, táýelsizdigin atap ótip jatqan el azamattary osy kúndi kórý úshin nebir jankeshti kúresterge barǵan baba­lar­dyń, olarǵa tirek bolǵan analardyń aldynda qa­ryz ekeni ras. Osyndaı mártebeli kúni elordada qalalyq Tilderdi damytý basqarmasynyń uıyt­­­qy bolýymen «Jasa máńgi, Qazaqstan!» atty ádebı-mýzykalyq kesh Kongress-Holl saraı­ynda ótti. Alǵashqy sózdi Parlament Senatynyń depý­taty Ádil Ahmetov alyp, ulttyq merekeni ulyq­tap jatqan zal toly jurtty quttyqtap, Pre­zı­denttiń syndarly ishki, kóp vektorly syrtqy saıasaty týraly oı terbep, 20 jyl ishindegi ta­bysymyzǵa jan-jaqty toqtalyp, Ulybrıtanııa saıasatkeriniń sońǵy on jyl ishinde Qazaqstandy álemdegi qarqyndy damyǵan úsh eldiń biri dep baǵalaǵanyn alǵa tartty. Eldik – birlikte, yrys – yntymaqta ekenin, qazaq úshin muńdy shaq, sherli kezeń artta qalǵanyn da atap ótti. Budan keıin D.Muqanov Birjan saldyń «Aıtbaı» ánin áýeletse, Q.Ahmetov «Týǵan elim» ánin shyr­qady. Jyraýlyq dástúrdiń úzilmeı kele jat­qan úlgisin A.Elshibaeva «Naýryzbektiń termesi» arqyly dáıektedi. Al belgili ánshi M.Arapbaeva K,Dúısekeevtiń «Sálem saǵan, týǵan el!» degen ánin kelistire aıtty. Bir sát sahna tórine danyshpan Abaı, oı­shyl Shákárim, otanshyl Ǵumar Qarash shyǵyp, sanańa sáýle túsirer sózderdi tógip-tógip jibergende ultymyzdyń uly da ulyq ekenine kóz jetkendeı boldy. Keńestik saıasat oıyńdy shyrmap, basyńdy qursaýlap turǵannyń ózin­de ulttyń tili, rýhy dep jar salǵan Ǵabıt Músirepov, Baýyrjan Momyshuly, Shona Sma­hanuly sııaqty alyptardyń da aty atalyp, Shoń Shókeń men Ábıirbek Tinálıevtiń «Anam­nyń tili» áni oryndalǵanda ón boıyńdaǵy qa­zaq­tyń asyl qasıetteri qyrandaı túlegeni anyq. Sol sekildi M.Maqataevtyń sózine jaz­ǵan T.Rahımovtyń «Qazaǵym-aı!» áni de áserli estildi. Sondaı-aq aqyn A.Asylbekov pen kompozıtor Á.Tinálıevtiń «Jeltoqsan jeli» atty áni de jurt kóńilin bir serpiltip ótti. Qazaqtyń osy zamanǵy has batyry, tuńǵysh ǵaryshker Toqtar Áýbákirov sahnaǵa shyqqanda kórermen jurt oǵan óziniń erekshe iltıpatyn kórsetti. Saraı ishiniń teń jartysynan kóbin alyp otyrǵan jigerli ul men qaıratty qyz ózderine úlgi tutqanynan bolar, dýyldata qol soǵyp jatty. Ǵaryshker olarǵa  namys bar jerde bárin jeńýge bolatynyn aıta kelip, biz baqytty adamdarmyz. Táýelsizdikti kórip, jemisin jep otyrmyz. Eldiktiń týy qolymyzda berik tur. Osy kúnge jetkenge deıin qanshama aldyńǵy tolqyn azap shekti. Solardy qurmet­tep jatqanymyz, bul – qazaqtyń ulylyǵyn kórsetedi. Qazaqstan 20 jyl ishinde alǵa órlep keledi. Úlken elde, úlken jerde baılyqty kó­beıtetin, jas urpaq sendersińder! Qazaqtyń máń­giligi de senderdiń qoldaryńda, dedi. Ba­tyr aǵa qurmetine aqyn ári sazger Erǵoja Ti­lep­berdıevtiń «Asyl aǵa» ánin N.Turlybekov, N.Balapanov, G.Myrzabekova, M.Haırolda, D.Ilııashevter asqaq rýhpen oryndady. Keshtiń ajaryn kirgizgen Ulyqbek Esdáý­lettiń «Qazaq tili», Serik Aqsuńqarulynyń «Azattyq», Serik Turǵynbekulynyń «Jasa­syn, qazaq, jasasyn!» óleńderin Q.Qýa­nysh­ba­ev at­yn­daǵy qazaq drama teatrynyń ártisteri or­yn­dasa, qazaq óleńiniń aqıyǵy Farıza Oń­ǵar­sy­nova eldigimizdiń erekshe qyrlaryn aı­typ, qala ákimi Imanǵalı Tasmaǵambetovtiń jas daryn Áıgerim Ibadýllaǵa alǵys hatyn tapsyrdy. Alash balasynyń rýhyn asyrǵan táýel­siz­dikke arnalǵan kesh Janat Shybyqbaıdyń or­yndaýyndaǵy jyr jampozy Qadyr Myrza Áli men belgili kompozıtor Eskendir Hasanǵa­lıev­tiń «Atameken» ánin búkil jurt qosylyp aıtyp, erekshe kóńil-kúımen tarady. Súleımen MÁMET.