Densaýlyq saqtaý mınıstri Salıdat Qaıyrbekova 2,5 myńnan astam aýyl dárigerleri jáne medısınalyq joo oqytýshylarymen, stýdentterimen «tikeleı rejimde» selektorlyq keńes ótkizdi.
Jıynda 2011-2015 jyldarǵa arnalǵan «Salamatty Qazaqstan» memlekettik baǵdarlamasyn iske asyrý barysy jáne aldaǵy jylǵa arnalǵan negizgi mindetter talqylandy.
Selektorlyq jıynǵa elimizdiń barlyq óńirinen 2,5 myńnan astam medısına qyzmetkerleri, medısınalyq joo stýdentteri, professor-oqytýshylar quramy qatysty. Mınıstr óz sózinde jalpy densaýlyq saqtaý júıesiniń barlyq baǵyttary boıynsha jaqsy dınamıka baıqalatynyn atap ótti.
Jıyn barysynda Salamatty ómir saltyn qalyptastyrý problemalary ulttyq ortalyǵynyń dırektory J.Battaqova, S.Asfendııarov atyndaǵy Qazaq ulttyq medısına ýnıversıtetiniń rektory A.Aqanov, Semeı memlekettik medısına ýnıversıtetiniń rektory T.Raqypbekov salamatty ómir saltyn nasıhattaý jáne densaýlyq saqtaý júıesine mamandar daıyndaý, sondaı-aq 2012 jyly alda turǵan mindetter týraly málimdedi.
Telemedısınanyń arqasynda aýyldyq medısına qyzmetkerleri tikeleı respýblıkanyń bas dárigeri – Densaýlyq saqtaý mınıstrimen tildesip, ózderin tolǵandyratyn suraqtarǵa jaýap aldy. Táýelsizdik jyldarynda densaýlyq saqtaý salasynda qol jetkizilgen jetistikter jáne bolashaqtaǵy mindetter týraly pikir almasty. Atap aıtqanda, Soltústik Qazaqstan oblysy Mamlıýt aýdanynyń pedıatry K.Knıazeva, Batys Qazaqstan oblysy Bórli aýdandyq aýrýhanasynyń akýsher-gınekology S.Batyrova, Qaraǵandy qalasynyń №4 qalalyq emhananyń bas dárigeri S.Shaıdarova, Semeı óńirlik onkologııalyq dıspanseriniń bas dárigeri M.Sandybaev, «Jas depýtattar qaýymdastyǵynyń» jetekshisi O.Tolkaılov jáne t.b. óz oılaryn ortaǵa saldy.
Bir aıta ketetin jáıt, Densaýlyq saqtaý mınıstrliginiń bastamashylyǵymen elimizdiń barlyq oqý oryndarynda aǵymdaǵy jylǵy jeltoqsannyń 7-12 aralyǵynda «Densaýlyq aptalyǵy» ótýde. «Densaýlyq sabaqtary» balalar men jasóspirimderdiń densaýlyǵyn saqtaýǵa, nyǵaıtýǵa, aýrýdyń aldyn alýǵa baǵyttalǵan.
«Egemen-aqparat».