Jaıyq óńirindegi jańa jobalar

Bul jıynǵa «Kazakh Invest»» UQ» AQ basqarma tóraǵasynyń orynbasary Birjan Kaneshev arnaıy qatysty. Keńes Ulttyq kompanııa tór­aǵasy men Batys Qazaqstan ob­l­ysy ákimi Altaı Kólginovtiń ara­­­syndaǵy josparly kelisim boıyn­­sha ótip otyr. О́tken jyly qu­­ryl­­ǵan kompanııa búginde naqty jo­ba­lar­­dy qolǵa almaq. 

– Biz Aqjaıyq óńirindegi kásip­ker­lermen kezdesip, bolashaqta qaı sa­lada qandaı jobalardy da­my­tý­ǵa bolatynyn talqyladyq. El­ba­synyń tapsyrmasy bar, biz­diń ulttyq kompanııanyń dırek­tor­lar keńesiniń tóraǵasy Baqytjan Saǵyntaevtyń tapsyrmasy bar. Memleket tarapynan naqty kómek ala­tyn mańyzdy jobalardy jı­naqt­ap, úkimet qaraýyna usy­namyz, – deıdi Birjan Kaneshev.

«Kazakh Invest» UK» AQ-tyń osy óńirdegi ókildigi dırektory Ánýar Nıetqalıevtyń aıtýynsha, aı­maqtyq ókildik jergilikti atqa­rý­shy qurylymdarmen, qarjy ınstı­týttarymen birlesip, belsendi ju­mys jasaıdy. О́kildik dırektory óńir­de qolǵa alynǵan jalpy somasy 2,6 mlrd AQSh dollaryna teń 11 joba­men tanystyryp, bolashaqta júze­ge asatyn jalpy quny 739 mln AQSh dollaryna teń jańa 9 joba týraly da aıtyp ótti. Onyń ishinde qus fabrıkasyn keńeıtý maqsatynda broılerdi jemdeıtin 24 qosymsha oryn salýǵa arnalǵan ınvestısııalyq joba bar. «Jaıyq et» JShS osy jobany júzege asyrsa, jylyna 7 myń tonna broıler etin daıyndaı alady. Al «Eurasian Logistics» JShS Oral qalasynda kólik-logıstıkalyq ortalyǵyn salýdy josparlap otyr eken. Jańadan ashylǵan mamandandyrylǵan ha­lyq­­qa qyzmet kórsetý ortalyǵy ma­ńynda qonaqúıi, janarmaı beketi men aýyr júk kólikterin jýatyn oryn da qarastyrylǵan keshen ashylsa, avtokólikke qatysty san túrli qyzmettiń basy bir jerge jı­naq­talǵan qalashyqqa aınalmaq. Son­daı-aq Chapaev selosyndaǵy «Batys Marka Lamb» JShS «Kazakh Invest» UK» AQ kómegimen usaq mal bordaqylaıtyn alań qurylysyn salý jobasyn júzege asyrýdy josparlap otyr.

Keńeste Bórli aýdanynda boı kóteretin asfalt-beton zaýyty­nyń jobasy tanystyryldy. Bul jobaǵa qarjy salýshy «Adal Arna Almaty» JShS ókili Borıs Gorlov Pepel razezinde salynatyn zaýyt jobasynyń quny shamamen 2,5-4,0 mln AQSh dollaryn quraıdy deıdi.

– Oblysta joldardy jóndeý bas­ty basymdyqqa ıe. Sondyqtan da ınves­tısııany osy salaǵa tartý qajet. О́kinishke oraı, bizdegi asfalt-beton zaýyttary zamanaýı stan­darttarǵa sáıkes emes. Al bul zaýyt jańa tehnologııalardy qol­da­natyn bolsa, keleshegi bar joba bol­ǵaly tur.

Oblystaǵy jol salýmen aınalysatyn kásiporyndardyń deń­geıi de tómen. Sol úshin jol kásip­oryndary ınvestısııa tartyp, ózderiniń materıaldyq-tehnıkalyq bazalaryn modernızasııalaýy kerek. Jol salýǵa qajetti shıkizattyń bolmaýy da bul sala jumysynyń qarqynyn tómendetip, sapasyna keri áser etedi. Investorlar bıtým shyǵarýdy oılastyrý kerek dep oılaımyn. О́ıtkeni bıtým sapaly bolsa, asfalt ta sapaly bolady, – dedi Altaı Kólginov.

Sondaı-aq Tasqala aýdanyn­da erte pisetin alma baǵyn qalyp­tas­tyrý qolǵa alyn­baq. Bul joba­ny keńeste «Teksas­Edvansd­Rısech­Sente» JShS dırek­tory Gazız Isaev tanystyrdy. Aqjaıyq óńiriniń ekologııalyq jáne klımattyq jaǵdaıy baý-baqsha ósirýge ábden laıyq.

TeksasEdvansdRısechSente» – tú­rik kompanııasy bolǵanymen, biz­diń elimizde, atap aıtqanda, Almaty jáne Túrkistan oblystaryn­da dál osyndaı ıntensıvti baq egip, táji­rı­bede synalǵan. Buryn Barbastaý taǵy basqa alma baqtarymen áıgili bolǵan Batys Qazaqstan óńiri sońǵy jyldary ımport almaǵa táýeldi bolyp qalǵan edi. Qazaqstan respýblı­ka­sy Aýyl sharýashylyǵy mınıs­tr­li­giniń málimeti boıynsha elimizde tu­tynylatyn almanyń 40%-y shetten ákelinedi eken. 

Joǵaryda Bórli aýdanynda salynatyn asfalt-beton zaýytynyń jobasy týraly aıtqan edik. Bórli – qazynaly Qarashyǵanaq ornalasqan óndiristi ólke. Osy aýdannyń ja­qyn­­da taǵaıyndalǵan ákimi San­jar Álıev ınvestısııa tartý jónin­de­gi keńeske arnaıy qatysyp, aýdan­nyń ınvestısııalyq áleýeti, kásip­ker­lerge arnalǵan qoldaý men múm­kindik týraly aıtyp berdi.

– Aýdan aýmaǵynda respýb­lı­ka­lyq mańyzy bar 100 shaqyrymnan asatyn «Podstepnyı-Elek-RF» avto­kólik joly bar. Bıylǵy bes aıda osy jolmen Reseı Federa­sııa­synyń shekarasynan 17 myń kó­lik ótipti. Biraq osy jol boıynda jo­laý­shylarǵa qyzmet kórsetetin oryn joq. Bórli aýylynda jol boıynda eki kafe jáne 2016 jyldan beri toqtap turǵan janarmaı quıý stansasy bar. Jol boıynda qyzmet kórsetetin nysandar ulttyq standarttarǵa sáıkes kelmeıdi, – deıdi Sanjar Álıev. Aýdan ákimi osy olqylyqty joıý úshin arnaıy shara qolǵa alynǵanyn aıtty.

Bir qyzyǵy, munaıy men gazy álemge taralatyn Bórli aýdany topyraǵy qunarly bolsa da kókó­nis­ti, sút pen et ónimderin ózge jaq­tan tasıdy eken. Endi ǵana sha­ǵyn jylyjaılar salý jobasy qol­ǵa alynǵan. Aýdan aýmaǵynda qý­at­tylyǵy 1MVt bolatyn 50 jel gene­ra­toryn qondyrý da josparlanyp­ty. Bul úshin Aqsaı qalasynyń soltústik bóliginde 100 ga jer telimi 49 jylǵa paıdalanýǵa berilgen.

Árıne ınvestısııa kásip­ker­likke qolaıly jaǵdaıy bar, bız­nes qorǵalǵan aımaqqa ǵana quıy­lady. Qazaqstan Respýblıkasy Mem­lekettik qyzmet isteri jáne sy­baı­las jemqorlyqqa qarsy is-qı­myl agenttigi Batys Qazaqstan obly­sy boıynsha departamentiniń bas­shysy Bolat Isaqovtyń aıtýyn­sha, «doing business 2018» reı­tıngisinde Qazaqstan 190 eldiń ara­synda 36-orynda tur eken. Al ınvestorlardy qorǵaý boıynsha elimiz 2011 jyldan beri 36-orynnan 3-orynǵa kóterilgen. Bul ıgi bastamany Batys Qazaqstan oblysynda da jalǵastyrý, óńirdegi ınvestısııalyq klımatty jaqsartý qajettigi osy keńeste jan-jaqty talqylanyp, oblys basshylyǵy tarapynan tıisti tapsyrma berildi.

Qazbek QUTTYMURATULY, «Egemen Qazaqstan»

Batys Qazaqstan oblysy