Qaraǵandy oblysynda «7–20 –25» baǵdarlamasy boıynsha alǵashqy ıpotekalyq nesıe berildi. Jas otbasy Osınsevter nesıeni «BankSentrKredıt» bankinen aldy. 28 jastaǵy Vladımır Osınsevtiń otaý qurǵanyna – bes jyl. Zaıyby ekeýi Amelııa esimdi bir jarym jasar qyzdaryn tárbıelep jatyr.
Vladımırdiń aıtýynsha, olar buǵan deıin páter jaldap kelgen. Endi memlekettik baǵdarlamanyń arqasynda jańa qurylystan kólemi 72,5 sharshy metr bolatyn jekemenshik páterge ıe boldy.
– Biz jekemenshik páter alý úshin qarjy jınadyq, alaıda jas otbasy úshin qajetti somany jınaýdyń qandaı qıyn ekenin ózderińiz de bilesizder ǵoı. Men Qazaqstanda bar ıpotekalyq nesıelendirý baǵdarlamalarynyń bárin de qarastyrdym. Biraq olardyń bir de biri alǵashqy tólemi kóp bolǵandyqtan bizge qolaıly bolmady. Tipti keıbir bankterde bastapqy tólem 30 mıllıon teńgege deıin jetip jatty. «7–20–25» baǵdarlamasy boıynsha bizdiń páterdiń baǵasy 15 mıllıon teńge boldy, artyǵymen tóleý 16 mıllıon teńgeniń shamasynda. Aı saıyn biz 85 myń teńgeden tólep otyramyz. Jalǵa alatyn páterge aı saıyn 100 myń teńgeden tólegennen bul bizge áldeqaıda jaqsy boldy, – deıdi Vladımır.
Otbasy úshin qajetti qujattardy jınastyrýǵa bes jumys kúni ketken eken. Búginde bank memlekettik baǵdarlama boıynsha baspana alýǵa tilek bildirgen taǵy da alty ótinimdi qarastyryp jatyr.
– Bankte baǵdarlama 4 shildeden bastaý aldy. О́tken aptada Qazaqstannyń alty qalasynda ıpotekalyq qaryz boıynsha nesıe berildi. Bizdiń óńirde bul baǵdarlama qatysýshysyna berilgen alǵashqy nesıe. Bul uzaq merzimdiligi esebinen óte qolaıly, nesıeni 25 jyl tóleýge bolady. Bastapqy tólem bar-joǵy 20%, ıaǵnı baǵdarlama boıynsha bizdiń óńirdegi páterdiń baǵasy 15 mıllıon teńge bolsa, bastapqy jarna 3 mıllıon teńgeni quraıdy. Paıyzdyq tólem de óte tómen, elimiz boıynsha – 7%. Qujattar tolyq jınalǵan kezde biz ótinimdi úsh jumys kúni ishinde qaraımyz, – dep túsindirdi «BankSentrKredıt» Qaraǵandy oblystyq fılıalynyń dırektory Roza Syzdyqova.
Ipotekalyq qaryzǵa ótinim rásimdeýge qajetti qujattar tizimine tabys týraly anyqtama nemese salyq deklarasııasy jáne jekemenshik baspanasy joqtyǵy týraly jergilikti atqarýshy organnan anyqtama kiredi. Bul talapqa jataqhanadaǵy bólmeler men apatty jaǵdaıdaǵy baspana jatpaıdy. Qalǵan qujattyń bárin qaryz alýshy kredıtor banktiń talaby boıynsha usynýy kerek.
Memlekettik baǵdarlama boıynsha ıpotekalyq nesıeni 25 jylǵa alý mindetti emes. Qaryzdy qaıtarý merzimin jetkilikti tabys kózi bolsa qysqartýǵa da bolady. Sondaı-aq baǵdarlamada aıyppul sanksııasynsyz qaryzdy merziminen buryn tólep tastaý da qarastyrylǵan.
Qaırat ÁBILDA,
«Egemen Qazaqstan»
QARAǴANDY