• RUB:
    6.68
  • USD:
    520.93
  • EUR:
    609.07
Basty saıtqa ótý
Jazǵy sport 20 Shilde, 2018

Shymbulaqta III Halyqaralyq taý jáne sport festıvali bastaldy

513 ret
kórsetildi

Búgin Almaty qalasy mańyndaǵy Shymbulaq taý shańǵy kýrortynda III Halyqaralyq taý jáne sport festıvali bastaldy.

Bıyl úshinshi ret ótip otyrǵan festıvaldiń uıymdastyrýshylary bul shara Almaty qalasynyń Qazaqstannyń sporttyq astanasy retinde ımıdjin jaqsartýǵa yqpal etedi dep otyr.

Úsh kúnge sozylatyn festıval aıasynda demalys kúnderi tabıǵı relefte sporttyq jartasqa órmeleý boıynsha halyqaralyq jarystar ótedi. Bir emes, birneshe asýdy baǵyndyrǵan dástúrli alpınıada qatysýshylary osy rette Jastar shyńyna kóteriledi (teńiz deńgeıinen 4147 metr bıiktikte).

Festıval qonaqtary sonymen qatar, maýntın-baık boıynsha saıys jáne túrli taý sporty is-sharalaryn tamashalaıdy. Festıval baǵdarlamasyna Densaýlyq kúni de engizildi. Iаǵnı senbi kúni festıvalge Almatydaǵy eń tanymal fıtnes-klýbtardyń komandalary da qatysady. Festıval kezinde arqanjolmen Shymbulaqqa baryp-qaıtý jol aqysy bar bolǵany 500 teńgeni quraıdy.

Festıval aıasyndaǵy taǵy bir aıtýly oqıǵa «Almatydaǵy taý týrızmin jáne buqaralyq sportty damytý tetikteri: búgin jáne erteń» atty dástúrli «Almaty Mount Forum» halyqaralyq forýmy. Atalmysh is-shara barysynda osy salanyń jetekshi sarapshylary taý týrızminiń álemdik naryǵyn jáne onyń Almatydaǵy alar ornyn, týrızm ındýstrııasynyń qala ekonomıkasyn damytýdaǵy róli, sondaı-aq, álem jáne Qazaqstandaǵy taý týrızm ınfraqurylymyn jandandyrýǵa qatysty máselelerdi talqylady.

Búgin arnaıy shaqyrylǵan qonaq,  Fransııadaǵy Les Portes du Mont Blanc taý shańǵy kýrortynyń basshysy Lýkas Marshand óz tájirıbesimen bólisti.

Almatyǵa arnaıy kelgen tanymal shved saıahatshysy Iohan Nılson da taý týrızmin nasıhattaýdyń, ómirlik ustanymdary, ataqty adamdardy tartý tájirıbesi týrasynda mysaldardy qyzyqty baıandady. Jıhankez 140 memlekette 30-dan astam ekspedısııany bastan ótkergen, sonyń ishinde Ońtústik polıýsten Soltústik polıýske 18 aıǵa sozylǵan ekspedısııa da bar. Osy saıahattyń quramynda bolǵany úshin Iohan Nılson 2015 jyly Gınnes rekordtar kitabyna endi. Qazirgi tańda tanymal saıahatshy Halyqaralyq tabıǵatty qorǵaý jáne jańadan qurylǵan Snow Leopard Foundation qorlarynyń elshisi bolyp tabylady.

Halyqaralyq taý jáne sport festıvali qazaqstandyq estrada juldyzdary qatysýymen ótetin merekelik konsertten keıingi saltanatty jabylý rásimimen támamdaldy. Uıymdastyrýshylar festıvaldiń ótýi Almaty qalasynyń ákimdigi júzege asyratyn barlyq áleýmettik jobalardyń birigýin jáne ózara árekettesýin qamtamasyz etedi dep úmittenedi.

Aınash ESALI,

«Egemen Qazaqstan»

ALMATY

Sońǵy jańalyqtar