Álemge belgili sportshy, olımpıadanyń qola júldegeri, Qazaqstanda mánerlep syrǵanaýdyń irgesin qalaǵan Denıs Tenniń tragedııalyq ólimi qostanaılyqtardyń da qabyrǵasyn qaıystyrdy. Qolyna aq tústi shar, gúl ustaǵan qala turǵyndary Tobyl ózeniniń jaǵsyndaǵy «Shaǵala» saıabaǵyna qaraı aǵyldy. О́zen jaǵasynda buzaqylardyń qolynan qapııada qaza bolyp, aqqan juldyzdaı aramyzdan ketip qalǵan Denısti eske alyp, onymen qoshtasty.
«Biz keshe osy sýyq habardy estigeli túnde otbasymyzben uıqymyz shala boldy, jylap aldyq. Denıstiń ár bir muzǵa shyqqan sátin qýana kútetin edik, ol sulýlyqtan, parasattylyqtan jaralǵandaı jan edi. Ol naǵyz jastardyń ustyny bolatyn, oǵan myńdaǵan jas búldirshinder eliktedi, Denısteı bolsam dep armandady. Eki soqtaldaı jigit sondaı daryndy, talantty, zııaly adamǵa qalaı pyshaq jumsady deseıshi?! Adamdyqtyń eń tómengi satysynan kóringen, ananyń sútin aqtamaǵan malǵundar», dep kúıine sóıledi Mádına men Zarına Salyqova degen egiz qyzdar. Ekeýi qolyna birneshe aq shar ustap kelipti, búgin Denısti eske alyp, qoshtasý rásimi retinde aspanǵa ushyratyndaryn aıtty.
Tobyl jaǵasyna kelýshilerdiń keshke qaraı qarasy molaıa tústi, admdar qolynda qyzyl gúl nemese aq shar ustaǵan. Barlyǵy da muńly, keıbir jastar tipti kóz jasyn da irke almady. Osynda fılosofııa ǵylymdarynyń kandıdaty, belgili ǵalym jáne ólketanýshy Qalqaman Jaqyp ta boldy.
«Bar-joǵy 25 jasynda aqqan juldyzdaı ketip bara jatqan Denıs Tenniń Qazaqstanǵa jasaǵan eńbegi ushan-teńiz. Sporttaǵy jeńisterimen Qazaqstandy dúnıege tanytty. Biraq áńgime onyń tek talantty sportshy ekeninde emes, adamgershiligi men tereń parasatynda edi. Sońǵy suhbatynda «syrtqa shyqqanda ózimdi koreı emes, qazaq sezinemin» degen sózi meni tańǵaldyrǵan, júregimdi ezip ketken edi. Ol adamdyqtyń Abaı aıtqan deńgeıinde boldy. Denısteı talantty, tamasha balamyzdan aıyrylyp qabyrǵamyz qaıysqan kezde, oǵan pyshaq siltegen buzaqylardyń bizdiń ulttan bolǵany meni taǵy kúıindirdi. Olar ózderin endi kim sanaıdy?», dedi Q.Jaqyp.
Denıs Ten qostanaılyqtardyń da máńgi júreginde!
Názıra Járimbet
«Egemen Qazaqstan»
Qostanaı