Búgingi tańda jalpy bilim berý baǵdarlamasy sheńberinde 5-7 synyptarǵa «Qazaqstan tarıhy», «Qazaq ádebıeti», «Geografııa», «Mýzyka» pánderin jańasha baıytyp, óz ólkeleriniń ótkeni men búginin qamtıtyn «О́lketaný» kýrstaryn engizý josparlanýda.
Birden aıta keteıik, ólketaný kýrsy bilim jáne tárbıe jumystary baǵytynda júzege asyrylatyn jalpy bilim berý isiniń quramdas bóligi. Negizgi maqsaty – oqýshylarǵa týǵan ólkesin tereńirek tanytyp, olardyń boılaryndaǵy azamattyq belsendilikti arttyryp, patrıottyq sezimderin ushtaý bolyp tabylady. Memleket basshysy Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasynda patrıotızmdi damytý máseleleri týǵan jerge degen súıispenshilikpen tikeleı baılanysty ekendigi atap kórsetilgen bolatyn.
Osy maqsatty júzege asyrýǵa oraı ár aımaqtyń óz oqýlyqtary daıyndalý ústinde. Taıaýda Kókshetaý qalasyndaǵy «Keleshek-2030» baspasy birneshe avtorlarmen birlese otyryp oqý-ádistemelik quraldy ázirlep, tanystyrý rásimin ótkizdi.
– Oqý ádistemelik quralyn daıyndaý barysynda oqýshylardyń jas ereksheligi, qabyldaý múmkindigi ári jańartylǵan oqý baǵdarlamasynyń sáıkestigi eskerildi, – dedi oblystyq bilim berý basqarmasy basshysynyń mindetin atqarýshy Valerıı Gamazov.
«О́lketaný. Aqmola oblysy» mektep kýrsy joǵaryda atalǵan tórt pánniń sheńberinde jıyrma saǵatqa arnalyp júrgizilgen 5-synyp oqýshylaryna týǵan ólkeniń tarıhy 4 saǵat, mýzykalyq mura 1 saǵat, al, 6-synyp oqýshylaryna ólke tarıhyn oqytýǵa 4 saǵat bólinip otyr. Qazaq ádebıeti páni sheńberinde 2 saǵat, al mýzyka sabaǵyna bir saǵat qosymsha kýrs ótkiziledi. 7-synyp oqýshylary ólke tarıhyn 4 saǵat oqysa, geografııaǵa eki saǵat bólinip otyr.
Endigi arada oblystyń oqýshylary óz aımaqtarynda bar ǵumyryn týǵan jerdi qorǵaýǵa arnaǵan Abylaı han, Bógenbaı batyr, Kenesary Qasymuly, Balýan Sholaq tárizdi aıtýly tulǵalardyń bolǵandyǵyn jáne olardyń kókirekterindegi elge degen ystyq mahabbattaryn, Otan qorǵaý jolyndaǵy qaıtpas erlikterin tanyp biletin bolady. Al mýzyka pánine engizilgen kýrs saǵattarynda qazaq án ónerine mol olja salǵan Birjan sal, Aqan seri, Úkili Ybyraı tárizdi óner juldyzdarynyń telegeı-teńiz shyǵarmashylyǵymen etene tanysady. 6-synypqa arnalǵan oqýlyq óńirdegi tamasha tabıǵattyń nur dıdaryn jas tolqynnyń kóz aldyna móldiretip ákeletindeı. Kógildir kólder men qoldyń salasyndaı aq qaıyńdar kómkergen dala dıdary sol ádemi aıshyǵymen kórkem bezendirilip, qyzyqty derekter keltirilgen. Jalǵyz tabıǵat qana emes, tamasha adamdar taǵdyry da ómirsheń ónege. Ondaı adamdardyń qatarynan Talǵat Bıgeldınov, Marııa Smırnova-Kýharskaıa, Klara Ámirova tárizdi tarıhı tulǵalar týraly taǵylymdy derekter keltirilgen. Sondaı-aq oqýlyqta oblystyń týrıstik baǵyttary da bar.
Oqýlyqqa qosymsha elektrondyq úlgi de berilip otyr. Bul ádis oqýlyqtyń júgin jeńildetýge sebep. Ári shalǵaıdaǵy aýyl-aımaqtyń muǵalimderi elektrondy úlgige óz eldi mekenderiniń tarıhyn, tamasha adamdar taǵdyryn qosý múmkindigi bar. Mundaı jumystar muǵalim men oqýshylardyń birlesken ujymdyq shyǵarmashylyǵy arqyly júzege asyrylady. Barlyq jumys jańartylǵan oqý baǵdarlamasyna sáıkes atqarylǵan. Sarapshy mamandar oqýshylarǵa usynylyp otyrǵan oqýlyqtardyń memlekettik standartqa sáıkes ekendigin anyqtap, oń baǵa bergen. О́lkeniń tarıhyn jas kókirekke tolaıym qotarýǵa septigi mol jumys bolashaqty baǵdarlaýǵa jasalǵan aýqymy mol, ıgi umtylys dep aıtýǵa ábden bolady.
Baıqal BAIÁDIL, «Egemen Qazaqstan»