Jambyl oblysynyń burynǵy Mıhaılovka aýdany búginde Baızaq batyr atymen atalady. Baızaq Mámbetuly – elimizdiń ońtústik óńirinde Qoqan handyǵyna jáne Reseı ımperııasyna qarsy ult-azattyq kóterilisti uıymdastyrýshy batyr retinde tarıhtan belgili. Aqyry ol Qoqan hany Álimquldyń buıryǵymen zeńbirek aýzyna baılanyp atylady. Al batyrdyń shashylyp ketken denesinen qalǵan eki saýsaǵy Talas ózeniniń boıyndaǵy Sarykemer aýylynyń mańyna jerlenedi. Bul kúnde batyr kesenesi Áýlıeata óńirindegi tarıhı-mádenı eskertkishterdiń birinen sanalady.
Qazaqstan Respýblıkasy Ulttyq mýzeıiniń janynan qurylǵan «Qasıetti Qazaqstan» ǵylymı-zertteý ortalyǵynyń «Qazaqstannyń jalpyulttyq kıeli oryndary» jobasy 100 nysanynyń tizimine aýdan ortalyǵy Sarykemer aýyly mańyndaǵy «Baızaq baba» kesenesi engizilgen bolatyn. Atalǵan kesene «Batys Eýropa – Batys Qytaı» tranzıttik dálizi boıynda ornalasqan. Endi tarıhı nysan aınalasy kóriktendirilip, abattandyrylatyn bolsa, bul bolashaqta týrısterdiń kelip tamashalaıtyn qasıetti ornyna aınalatyn bolady.
Jyl saıyn kesenege mektep oqýshylary men aýdan jastary keledi. Sonymen qatar munda týrısterdiń ekskýrsııalaryn uıymdastyrý, aýdan kólemindegi tarıhı oryndardyń stendilerin jáne kıeli jerlerdiń maketterin daıyndap, kesene mańyna ornalastyrý, sondaı-aq túrli qolóner buıymdarynyń kórmesin uıymdastyrý josparlanýda. Al búgingi tańda kásipkerlerdiń demeýshiligimen «Baızaq baba» kesenesine baratyn jol salynyp, sý tartylyp, kógaldandyrý jumysy qolǵa alynyp, mańyna kespe tastar tóselgen. Sonymen qatar kesene mańyn jaryqtandyrý jáne aınalasyn qorshaý jumystary júrgizildi. Keleshekte bul oryn Áýlıeata óńirindegi Qarahan, Aısha bıbi, Babadja hatýn keseneleri sekildi tarıhı nysanǵa aınalyp jatsa, óńir tarıhyna da tyń better qosylmaq.
Hamıt ESAMAN,
«Egemen Qazaqstan»