Indonezııanyń astanasy – Djakartada alaýy jaǵylǵan Jazǵy Azııa oıyndarynyń úshinshi jáne tórtinshi jarys kúnderinde Qazaqstan quramasynyń qorjyny 14 medalmen tolyqty.
Azııa oıyndarynyń úshinshi jarys kúninde qazaqstandyq sportshylar alty júlde jeńip aldy. Onyń úsheýi balýandarǵa tıesili bolsa, eki medal taekvondoshylarǵa buıyrdy. Al sý dobynan Qazaqstan quramasy el qorjynyna altynshy medaldi saldy.
Grek-rım kúresinen 67 kıloda beldesken Almat Kebispaev Azııa oıyndarynyń kúmis júldegeri atandy. Ol fınaldyq kezdesýde eki dúrkin álem chempıony, ońtústikkoreıalyq balýan Rıý Zan Sýdan 4:5 esebimen jeńildi. Al byltyr grek-rım kúresinen Parıjde ótken álem chempıonatynda kúmis júlde alǵan Meırambek Aınaǵulov (57 kılo) pen qyzdar kúresinen Rıo Olımpıadasynyń qola júldegeri atanǵan otandasymyz Elmıra Syzdyqova (76 kılo) Azııa oıyndarynda qola medal enshiledi. Aınaǵulov úshinshi oryn úshin kúreste Soltústik Koreıa sportshysynan 13:5 esebimen basym tússe, Syzdyqova Ońtústik Koreıa sportshysyn 5:2 esebimen jeńdi.
Sonymen qatar úshinshi jarys kúninde eki birdeı taekvondoshymyz Azıada júldesine qol jetkizdi. Rýslan Japarov qola medal ıelense, Jansel Denız fınalda utylyp, kúmisti qanaǵat tutty. Sý dobynan Qazaqstan qyzdar komandasy Azııa oıyndarynyń kúmis júldegeri atandy. Vaterpolshy qyzdar Azııa chempıony atanǵan Qytaı quramasyna ǵana ese jiberdi. Al maýntınbaık sportynan (kross-kantrı) Kırıll Kazansev el qorjynyna Azııa oıyndarynyń qola júldesin saldy.
● Al tórtinshi jarys kúninde otandastarymyz alty júlde jeńip aldy. Semserlesýden erler jáne qyzdar quramasy jartylaı fınalda qarsylastaryna ese jiberip, el qorjynyna qola júldeni saldy. Erler Japonııa quramasynan jeńilse, qyzdar Qytaı sportshylarynan basym túse almady. Semserlesý sportynyń erejesi boıynsha, jartylaı fınalda jeńilgen komanda avtomatty túrde qola júldege ıelik etedi.
Baıdarka men kanoe esýden Aleksandr Kýlıkov eskek esýdegi «slalom» baǵdarlamasy boıynsha úshinshi orynǵa taban tirep, Azııa oıyndarynyń qola júldegeri atandy. Sondaı-aq taekvondo sportynan 80 kılo salmaqta synǵa túsken Nurlan Myrzabaev jartylaı fınalda koreıalyq sportshydan jeńilip, qolany qanaǵat tutty. Azııa oıyndarynyń úsh dúrkin chempıony, Rıo Olımpıadasynyń jeńimpazy Dmıtrıı Balandın 100 metrge brass ádisimen júzýde Azııa oıyndarynyń qola júldegeri atandy. Balandın fınaldyq saıysta Japonııa jáne Qytaı sportshylaryna ese jiberdi. Grek-rım kúresiniń balýany Azamat Qystybaev (87 kılo) qola úshin ótken beldesýde úndistandyq sportshyny jeńip, Qazaqstan quramasyna Azııa oıyndaryndaǵy 19-shy júldeni áperdi.
Álı BITО́RE,
«Egemen Qazaqstan»