Kásipqoı bokstan AQSh-tyń Kalıfornııa shtatyndaǵy Kosta-Mesa qalasynda ótken qazaqstandyq Álı Ahmedov pen meksıkalyq Djovanı Haver Gomes arasyndaǵy jekpe-jek jerlesimizdiń aıqyn jeńisimen aıaqtaldy.
Jartylaı aýyr salmaqta kúsh synasyp júrgen 27 jastaǵy Gomes osy kúnge deıin 31 kezdesýde 17 ret jeńiske jetip, 11 básekeni merziminen buryn aıaqtaǵan edi. Al 23 jastaǵy Ahmedov bolsa, 12 jekpe-jektiń barlyǵynda basymdyq tanytyp, 9 qarsylasyn esinen tandyrdy. Bul keshte qazaqstandyq órenniń ústemdigi birden baıqaldy.
Báseke bastalǵan bette tizgindi myqtap qolǵa alǵan Álı Djovannıdi aýyr soqqylardyń astyna aldy. Alǵashynda qarsylyq kórsetýge tyrysqan meksıkalyq boksshy aqyrynda búıirinen qatty soqqy jiberip aldy. Sodan ol kezdesýdi jalǵastyrýǵa jaramady. Osylaısha, bul aıqastyń taǵdyry birinshi raýndta-aq sheshildi.
Osy jeńisiniń arqasynda Álı Ahmedov óziniń tıesili NABF Junior nusqasy boıynsha chempıondyq ataqty saqtap qaldy. Ǵalym SÚLEIMEN,
«Egemen Qazaqstan»