Túrkistan qalasynda «Áziret Sultan» memlekettik tarıhı-mádenı qoryq-mýzeıiniń uıymdastyrýymen Qazaqstan Respýblıkasy Prezıdenti Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyn talqylaýǵa arnalǵan jıyn ótti.
Basqosýda mýzeı basshysy Nurbolat Ahmetjanov Joldaýda kórsetilgen el damýynyń basym baǵyttary men mindetterine toqtaldy.
«Mańyzdy qujatta Qazaqstannyń jalpy áleýettik ómir sapasyn jaqsartý jáne bizdiń salaǵa qatysty mádenıet men týrızmdi damytý máseleler qamtyldy. Elbasynyń Joldaýy – jańa maqsattarǵa jeteleıtin eń basty qujat bolyp tabylatyny aıqyn. Sondyqtan mýzeı ujymyn Elbasyn Joldaýyn halyq arasynda nasıhattaý jumystaryna, negizgi basymdyqtarynyń joǵary deńgeıde júzege asyrylýyna belsendi atsalysýǵa shaqyramyn», dedi mýzeı dırektory Nurbolat Qadyruly.
Sonymen qatar mýzeı dırektory kelgen qonaqtarǵa «Áziret Sultan» qoryq-mýzeıiniń 2018-2022 jyldarǵa arnalǵan damý konsepsııasymen tanystyryp, aldaǵy ýaqytta atalǵan konsepsııa óz jemisin beretinin senimmen jetkizdi.
Sharaǵa Túrkistan qalalyq ardagerler keńesiniń tóraǵa orynbasary Dosybekov Pernetaı, Memlekettik jastar syılyǵynyń laýreaty, sazger, Q.A.Iаsaýı atyndaǵy HQTÝ professory Bekjigit Serdáli, QR Bilim berý isiniń úzdigi, «Etnopedagogıkalyq» kolledj dırektory Aıǵanym Serim, «О́zbek etnomádenı» ortalyǵynyń tóraǵa orynbasary Qoshqarov Raıym, sondaı-aq mýzeı qyzmetkerleri qatysty.
Kezekti Joldaýdy túsindirýge arnalǵan jıynda qatysýshylar Elbasynyń bıylǵy Joldaýy týraly oılaryn keńinen ortaǵa salyp, saıası qujattyń ereksheligi men mańyzdylyǵyn sóz etti.