Parlament Senatynyń depýtattary Mıhaıl Bortnık pen Manap Kóbenov jumys saparymen Pavlodar oblysyna baryp, jurtshylyqpen kezdesýler ótkizdi.
Sapar barysynda senatorlar Pavlodar qalalyq №1 aýrýhana ujymymen kezdesip, Elbasynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» Joldaýynyń negizgi baǵyttaryn túsindirdi. Depýtattar naýqastardy emdeý salasynda jańa ádisterdi engizýge atsalysqan ýchaskelik dárigerlerdiń eńbekaqysy 2019 jyldyń 1 qańtarynan bastap kezeń-kezeńmen ulǵaıatynyn atap ótti. Sondaı-aq olar medısınalyq qujattardy sıfrlandyrýǵa aýystyrý qajettigine nazar aýdardy.
Senatorlar sonymen qatar Ýspensk aýdanyndaǵy «Galıskoe» seriktestiginiń jumysymen tanysty. Kezdesýde Joldaýda aıtylǵan máseleler jáne elimizge zamanaýı agrotehnologııalardy kóptep tartýǵa baǵyttalǵan agroónerkásip keshenine memlekettik qoldaý kórsetý sharalary talqylandy.
Farıda BYQAI,
«Egemen Qazaqstan»
PAVLODAR