Akkredıtteý jáne reıtıngtiń táýelsiz agenttigi Qazaqstan Respýblıkasy Tuńǵysh Prezıdenti – Elbasy qorymen birge «Bilim berý sapasyn qamtamasyz etý» boıynsha II Ortalyq Azııa halyqaralyq forýmyn ótkizdi.
Alqaly jıynnyń negizgi maqsaty – bilim berý sapasyn arttyrý, akkredıtteý jáne reıtıngilik zertteýlerdi qamtamasyz etý júıesin damytý, halyqaralyq standarttar boıynsha bilim berý, oqý baǵdarlamalary jáne bilim alýshylardy daıyndaý traektorııasy sapasyn arttyrý, eń úzdik praktıkany talqylaý maqsatynda halyqaralyq únqatysý alańyn qurý.
Jıyn barysynda Bilim jáne ǵylym vıse-mınıstri Ashat Aımaǵambetov túlekterdiń bilikti mamanǵa aınalýy memleket úshin mańyzdy máselelerdiń biri ekenin tilge tıek etip, bul oraıda elimizde atqarylyp jatqan jumystarǵa toqtalyp ótti.
«Elbasy jańa Joldaýynda joǵary oqý oryndarynyń sapasyn kóterý boıynsha aldymyzǵa úlken mindet qoıyp, birneshe tapsyrma bergen bolatyn. Osy baǵytta Bilim jáne ǵylym mınıstrligi tıisti jumys atqaryp jatyr. Búgingi tańda Eýropadan, Qyrǵyzstannan, Fransııadan, basqa da memleketterden sarapshylardy jınap, osy máseleni talqylaý ústindemiz. О́ıtkeni joǵary bilimniń sapasyn kóterý máselesi óte ózekti taqyryptardyń biri. Qazirdiń ózinde birneshe normatıvtik quqyqtyq qujattarǵa mınıstrlik tıisti ózgerister engizip jatyr. Eń basty máseleniń biri – túlekterdi jumysqa turǵyzý jaıy. Bizdiń oıymyzsha, JOO-nyń sapaly bilim berip jatqandyǵynyń birden-bir belgisi jumysqa turǵyzý kórsetkishi dep aıtýǵa bolady. Eger JOO jaqsy maman daıyndap jatsa, árıne onda naryq túlekterdi jumysqa qabyldaıtyn bolady», dedi A.Aımaǵambetov.
«Statıstıka boıynsha joǵary oqý ornyn bitirgen túlekterdiń bir jylda qanshasy jumysqa turady» degen jýrnalıstiń qoıǵan suraǵyna vıse-mınıstr eń bastysy – memlekettik zeınetaqy qorynyń kórsetkishi ekenin aıtty. «Bul – resmı kórsetkish. Eger túlekterimiz jumysqa ornalasatyn bolsa, onda zeınetaqy qoryna tólenetin qarjynyń kórsetkishteri bolý kerek. Sol kórsetkishterge baılanysty bitirýshi túlekterdiń jumysqa ornalasý máselesi qanshalyqty sheshimin taýyp jatqanyn baıqaı alamyz. Stýdentterdiń jumysqa ornalasýy jóninde málimetti JOO-dan suraıtyn bolsaq, olar túrli anyqtamalardy jınap alyp, bizge bir málimet berýi múmkin. Sondyqtan, biz úshin eń birinshi joǵary oqý oryndarynyń ózderiniń aqparaty emes, resmı málimet, ıaǵnı zeınetaqy qoryna tólep otyrǵan kórsetkishter mańyzdy. Eger túlek jumysqa ornalassa, onyń jalaqysynyń 10 paıyzy zeınetaqy qoryna aýdarylady. Sondyqtan osy kórsetkishter arqyly shynaıy aqparatqa qol jetkize alamyz», dedi ol.
Forým jumysyna Májilis depýtattary, Qyrǵyzstan, Tájikstan, О́zbekstan, Reseıdiń Bilim jáne ǵylym mınıstrlikteriniń ókilderi, joǵary bilim berý sapasyn qamtamasyz etý halyqaralyq eýropalyq jelileri, sheteldik akredıtteý organdarynyń ókilderi qatysty.
Raýan QAIDAR,
«Egemen Qazaqstan»