Petropavl qalasynyń kire beris qaqpasyna batyr, sardar, aqyn, memleket qaıratkeri Qojabergen jyraýǵa eńseli eskertkish qoıyldy.
Saltanatty rásimge «Nur Otan» partııasy Tóraǵasynyń birinshi orynbasary Máýlen Áshimbaev, oblys ákimi Qumar Aqsaqalov qatysyp, sóz sóıledi. Sheshender, basqa da sóıleýshiler ataqty «Elim-aı dastanynyń avtory babamyzdyń óshpes erligi, ónegeli ómiri jurtshylyq esinde saqtalatynyn, jastarǵa úlgi-ónege bolatynyn, ulyny ulyqtaý el paryzy ekenin jetkizdi.
Qolyna dombyra ustap, at ústine qonǵan Qojabergen eskertkishiniń bıiktigi 12 metr. Avtory–esimi Qazaqstanǵa belgili músinshi Qazybek Satybaldın.
Qojabergen jyraý Jambyl aýdany Gúltóbe jerinde dúnıege kelgen. Táýelsizdik alǵannan bergi kezeńde ataqty jyraý, qolbasshy jaıly tarıhshylar kóptegen qundy eńbekter jazdy. Qazir onyń atynda mektep bar. «Qojabergen jyraý–Táýelsizdiktiń, Qazaq memlekettiliginiń jáne halyq birliginiń sımvoly» degen taqyrypta M. Qozybaev atyndaǵy Soltústik Qazaqstan memlekettik ýnıversıtetinde ótken ǵylymı-tájirıbelik konferensııada Ulttyq ulan Petropavl áskerı ınstıtýtyna onyń atyn berý týraly másele kóterilip, usynys qoldaý tapty.
Qojabergen Tolybaıuly – «Jeti jarǵyny» jazýǵa qatysqan, Táýke hannyń zamandasy, Bógenbaı batyrdyń ustazy, uly Abylaı hannyń keńesshisi bolǵan tarıhı tulǵalardyń biri. Eskertkishke gúl shoqtary qoıylyp, baba rýhyna taǵzym etildi.
О́mir ESQALI,
«Egemen Qazaqstan»
Soltústik Qazaqstan oblysy