Qurlyqtyq hokkeı lıgasynda (QHL) kúsh synasyp júrgen Astananyń «Barysy» kezekti týr oıynyn Ekaterınbýrgte ótkizip, jergilikti «Avtomobılısti» 2:1 esebimen utty.
Bul jeńistiń bizder úshin jóni bólek. Olaı deýge negiz, qazirgi kezde «Avtomobılıstiń» qarqyny óte kúshti. QHL-dyń bıylǵy maýsymynda olar 18 ret muz aıdynyna shyǵyp, barlyq básekede basymdyq tanytty. Iаǵnı, qatarynan 18 jeńis! Aıtýly komandanyń oıynshylary 66 ret nysanany dál kózdep, óz qaqpalaryna nebary 24 shaıba jiberip aldy. Sonyń nátıjesinde 36 upaıdy qorjynǵa salǵan ekaterınbýrgtik klýb jarys kestesinde jeke-dara kósh bastap tur.
Mine, osyndaı azýly komandamen kúsh synasqan jerlesterimiz óte keremet oıyn órnegin kórsetti. Saýatty taktıka qoldanyp, ár oıynshy ózine júktelgen mindetti asqan jaýapkershilikpen atqarǵannyń arqasynda «Barys» adýyndy «Avtomobılısti» súrindirdi. Matchtyń 15 jáne 26 mınýttarynda kanadalyq legıoner Patrıs Korme soqqan qos golǵa aıdyn ıeleri bir ǵana shaıbamen jaýap qaıtara aldy. Bizdiń qaqpaǵy soǵylǵan jalǵyz goldyń avtory kezinde «Barystyń» namysyn qorǵap, bul kúnderi «Avtomobılıstiń» sapynda óner kórsetip júrgen Naıdjel Doýs ekenin de aıta ketýge tıispiz.
Osy jeńisinen keıin astanalyq klýb QHL-dyń turaqty birinshiliginiń jarys kestesinde 10 orynǵa kóterildi. 16 kezdesýden keıin «Barys» 22 upaıdy ıelenip otyr.
Ǵalym SÚLEIMEN,
«Egemen Qazaqstan»