«Rýhanı jańǵyrý» baǵdarlamasynyń sheńberinde Almaty oblysynyń «Jer jánnaty Jetisý jerinen kóne Taraz óńirine» atty rýhanı kerýeni Áýlıeata óńirine kelgen bolatyn.
Ejelden Áýlıeata atanǵan tarıhı mekenniń sherter syry kóp. Jetisýlyqtar áýeli oblys ortalyǵyndaǵy «Kóne Taraz» tarıhı-mádenı kesheninde bolyp, eki myń jyldan astam tarıhy bar kóne shahardyń tarıhyn tamashalady. Munda kelýshi qonaqtardy Jambyl oblystyq mádenıet, arhıvter jáne qujattama basqarmasyna qarasty «Tarıhı eskertkishterdi qorǵaý jáne qalpyna keltirý dıreksııasy» tarıh jáne arheologııa bóliminiń basshysy Saýran Qalıev Taraz qalasynyń ejelgi orynymen tanystyrdy. Myńdaǵan jyldar boıy saqtalyp kelgen alyp qorǵandar, qundy jádigerler týrasynda maǵlumat berdi. Sonymen qatar, jetisýlyqtarǵa «Kóne Taraz» kesheniniń aýmaǵyndaǵy erte ıslam dáýirindegi meshit tarıhyn, Taraz jerinde bolǵan áıgili Atlah shaıqasyn, balbal tastardyń taǵdyryn áńgimeledi.
Budan keıin Jambyl oblysynyń ákimi Asqar Myrzahmetov Almaty oblystyq máslıhatynyń hatshysy Sultan Dúısenbınov bastaǵan jetisýlyqtarmen kezdesti. О́z kezeginde ákim qos óńirdiń taǵylymǵa toly tereń tarıhy týraly sóz qozǵap, búgingi tańda Jetisý jáne Áýlıeata óńirleriniń arasyndaǵy mádenı baılanystyń berik ekenine toqtaldy. Sonymen qatar Elbasynyń «Rýhanı jańǵyrý» baǵdarlamasynyń mańyzdylyǵyn atap ótti. Kezdesý barysynda Almaty oblysynyń qurmetti azamaty, áıgili «Taqııaly perishte» fılminde Taılaq beınesin somdaǵan akter Álimǵazy Raıymbekov, Sultan Dúısenbınov jáne ózge de azamattar sóz alyp, óz oılarymen bólisti.
Jalpy, Jambyl óńiri degende Aqyrtas, Tórtkúl keshenderi men Qarahan, Aısha bıbi, Dáýitbek keseneleri sııaqty tarıhı nysandar eske túsedi. Bul oraıda jetisýlyq rýhanı kerýen músheleri Jambyl oblysynyń osyndaı tarıhı-mádenı jerlerine saıahat jasap, taǵylymdy oryndarmen tanysty. Árbir nysannyń taǵdyry men tarıhy týraly áńgimege qanyqty.
Hamıt ESAMAN, «Egemen Qazaqstan» Jambyl oblysy