Búgin Halyqaralyq Túrki akademııasynda Túrkııa Respýblıkasynyń 95 jyldyǵy atalyp ótti.
Merekelik jıynǵa Halyqaralyq Túrki akademııasynyń prezıdenti Darhan Qydyráli, Túrkııa Respýblıkasynyń Qazaqstandaǵy Tótenshe jáne ókiletti elshisi Nevzat Ýıanyk, Ázerbaıjan Respýblıkasynyń Qazaqstandaǵy Tótenshe jáne ókiletti elshisi Rashad Mamedov, Mońǵolııa memleketiniń Qazaqstandaǵy Tótenshe jáne ókiletti elshisi Lývsan Battýlga, Túrki akademııasynyń aqsaqaldar keńesiniń músheleri, Myrzataı Joldasbekov pen Ádil Ahmetov, Syrtqy ister mınıstrliginiń ókilderi, túrkologtar qatysty.
Alqaly jıyndy Túrki akademııasynyń prezıdenti Darhan Qydyráli ashyp, jınalǵan qaýymdy, Túrkııa Respýblıkasynyń elshisin aıtýly merekemen quttyqtady.
«Mustafa Shoqaı bir maqalasynda árbir túrki kindiginen taraǵan azamattyń eki Otany bar. Biri – óziniń týǵan jeri bolsa, ekinshisi – Túrkııa» dep jazǵan. Rasynda osydan 95 jyl buryn qurylǵan Túrkııa memleketi túrki halyqtarynyń qıyn-qystaý kezinde qamqorlyq jasap, arqa súıer tirek bolǵan. Búginde Halyqaralyq Túrki akademııasynyń quryltaıshy memleketteriniń biri Túrkııa Respýblıkasynyń 95 jyldyǵy – Túrki akademııasy úshin de úlken mereke. Halyqaralyq túrki akademııasynyń quryltaıshy memleketteriniń barlyq memlekettik merekelerin akademııada atap ótý jóninde sheshimi qabyldandy», dedi D.Qydyráli.
Jıynda sóz alǵan Túrkııa elshisi Nevzat Ýıanyk Túrkııa Respýblıkasynyń 95 jyldyǵyn joǵary deńgeıde atap ótip, túrki álemine eleýli úles qosyp júrgen azamattardy bir ortada jınaǵany úshin Akademııa basshysyna alǵys bildirdi.
«Túrkııa Respýblıkasy I dúnıejúzilik soǵystan keıin Osman ımperııasynyń ornyna quryldy. Memleketimizdiń 95 jyldyǵyn atajurtymyzda toılaý biz úshin úlken qýanysh. Onymen qosa, bul kúndi Qazaqstannyń elordasynda, Túrki akademııasynyń shańyraǵynda toılaý merekeni ereksheleı tústi. Eki eldiń basshylarynyń jaqsy qarym-qatynasy baýyrlas memleketterdiń tatýlyǵynan baıqalady. Táýelsizdigimiz, dostyǵymyz, baýyrlastyǵymyz máńgilik bolsyn», dedi elshi.
Ázerbaıjan elshisi Rashad Mamedov óz sózinde búgingi Túrkııanyń uly Osman ımperııasynyń jalǵasy ekenine toqtalyp, álemdik saıasatta, ekonomıkada ózindik orny bar memleketke aınalǵanyn atap ótti.
«Ázerbaıjan prezıdenti Geıdar Alıev bir sózinde Túrkııa men Ázerbaıjan memleketterin «bir ult, eki memleket» degen bolatyn. Túrkııa Ázerbaıjan memleketin qashan da qoldap keldi. Táýelsizdik alǵan jyldary Túrkııanyń saıası, ekonomıkalyq kómegi qazirgi Ázerbaıjandy qurýǵa kúsh berdi. Prezıdentimiz Ilham Alıev sońǵy kezdesýinde «Túrkııanyń jetistigi – Ázerbaıjan jetistigi» degen bolatyn. О́z atymnan, ázerbaıjan halqynyń atynan Túrkııa Respýblıkasyn 95 jyldyǵymen shyn júrekten quttyqtaımyn», dedi R.Mamedov.
Túrkııany aıtýly merekesimen quttyqtaýshylar qatarynda Mońǵolııanyń Qazaqstandaǵy elshisi Lývsan Battýlga da boldy.
«Túrkııa men Mońǵolııa memleketteriniń dostyq qatynas ornatqanyna 60 jyldaı ýaqyt ótti. Mońǵolııa – túrki áleminiń mańyzdy eskertkishterin ıemdegen memleket. Sondyqtan, aradaǵy rýhanı, mádenı, saıası qatynasty odan ári de damyta túsýimiz kerek», dedi elshi. Sonymen qatar L.Battýlga Túrki akademııasynyń túrki álemin Mońǵolııamen baılanystyratyn kópir ekenin, Mońǵolııanyń túrki áleminde alar orny erekshe ekenin aıtyp ótti.
Túrki akademııasynyń syıly aqsaqaly, qoǵam qaıratkeri, ǵalym Myrzataı Joldasbekov Túrkııa men táýelsiz Qazaqstannyń qarym-qatynasyndaǵy alǵashqy qadamdary týraly estelikterimen bólisip, Túrkııadaǵy alǵash ret uıymdastyrylǵan Qazaqstannyń mádenı kúnderi týraly áńgimeledi. Akademııa aqsaqaldar keńesiniń múshesi, ǵalym Ádil Ahmetov Túrkııa Respýblıkasyn eleýli merekesimen quttyqtap, eki el dostyǵynyń máńgilik bolýyn tiledi.
Svetlana ǴALYMJANQYZY,
«Egemen Qazaqstan»