Áýpildek qusy negizinen kólbuqalar týysy bolyp esepteledi. Olar ózender men kólderdi jáne qalyń qamys arasyn mekendeıdi. Qazaqstanda qustyń bul túri kezdespegenimen, mamandar áýpildektiń elimiz arqyly ushyp ótetinin aıtady.
Jalpy, áýpildek uǵymy halqymyzǵa jat emes. «Qamysy Áýpildektiń múshe-múshe, sarǵaıdym osynaý kóldiń sýyn ishe. Qos qanat qusqa bitken, maǵan bitse, barar em qalqajanǵa áldeneshe» dep bastalatyn halyq áni de bar. Jaqynda ǵana áýpildek qustyń Áýlıeata óńirine oqystan kelgeni jaıly habar estidik. Qyzyqty habar kópshilikke de tańsyq kóringeni ras.
Taraz qalasyndaǵy «Fenıks» qonaqúıiniń aýlasyna belgisiz qus kelip qonady. Bul týraly alǵashqy aqparatty qonaqúı ıesi A.Maralova elimizdiń Aýyl sharýashylyǵy mınıstrligine qarasty Orman sharýashylyǵy jáne janýarlar dúnıesi komıtetiniń baspasóz hatshysy S.Dildahmetovke jetkizedi. Nátıjesinde Jambyl oblystyq orman sharýashylyǵy jáne janýarlar dúnıesi aýmaqtyq ınspeksııasy janýarlar dúnıesi jáne ańshylyq sharýashylyǵy bóliminiń mamandary J.Dúısenbaeva, S.Minturǵanov, Taraz qalalyq veterınarııa qyzmeti ınspeksııasynyń bas mamany A.Súgirbaev jedel áreketke kóship, atalǵan qustyń Reseı memleketiniń «Qyzyl kitabyna» engen áýpildek ekenin anyqtaǵan. Taraz qalalyq veterınarııa qyzmeti ınspeksııasynyń málimetinshe, áýpildek úı janýarlary dárigeriniń klınıkalyq tekserýinen ótkizilgen. Tekserý nátıjesinde jabaıy qustan eshqandaı aýrý belgileri tabylmaǵan.
S.Minturǵanovtyń aıtýynsha, qustyń qanattary jáne aıaqtary saý. Sondyqtan qustyń óz betinshe usha alatyndyǵy týraly anyqtama daıyndalǵan. «Úlken qus tirshilik ortasyna qaıta jiberildi. Qazaqstanda bul qus mekendemeıdi. Tek bizdiń memleketimiz arqyly ushyp ótedi», deıdi ol.
Hamıt ESAMAN,
«Egemen Qazaqstan»
Jambyl oblysy